Një shtetas shqiptar, 68 vjeç, është arrestuar nga autoritetet greke në Follorinë, pasi dyshohet se transportonte një sasi të konsiderueshme lënde narkotike.
Arrestimi u krye gjatë një operacioni të zhvilluar nga strukturat e Hetimit dhe Ndjekjes Penale të Krimeve, në kuadër të luftës kundër trafikut ndërkombëtar të drogës.
Sipas policisë greke, pas grumbullimit dhe analizimit të informacioneve operative, efektivët lokalizuan automjetin që drejtohej nga 68-vjeçari në orët e para të mëngjesit.
Gjatë kontrollit të mjetit u zbuluan dy çanta udhëtimi dhe një thes, ku ishin fshehur 50 pako me marijuanë, me një peshë të përgjithshme prej 55 kilogramësh e 422 gramësh.
Në kuadër të hetimeve u sekuestruan gjithashtu tre telefona celularë, të cilët pritet të analizohen për të identifikuar persona të tjerë të përfshirë në këtë aktivitet kriminal.
Autoritetet greke theksojnë se muajt e fundit është vënë re një shtim i rasteve të trafikimit të drogës nga Shqipëria drejt Greqisë.
Sipas të dhënave zyrtare, gjatë 11 muajve të fundit janë sekuestruar mbi 1.2 ton marijuanë në rajonet e Igumenicës, Janinës, Kosturit, Follorinës dhe Selanikut.
Hetimet kanë treguar se një pjesë e konsiderueshme e këtyre sasive dyshohet se është transportuar përmes itinerarit Sarandë–Igumenicë, i cili mbetet një nga rrugët më të përdorura nga grupet kriminale.
Në një operacion të mëparshëm, autoritetet greke bllokuan në portin e Igumenicës edhe një skaf të ngarkuar me lëndë narkotike.
Discussion about this post