Seanca e së hënës, skenari i opozitës dhe masat e Gardës

Të hënën pasdite Kuvendi do të mblidhet në një seancë plenare, ndërsa 23 deputetë të opozitës, referuar vendimi të marrë nga Komisioni i Etikës, janë të përjashtuar.

Por një mesazh i kreut të Grupit Parlamentar demokrat, Gazment Bardhi, fton të gjithë deputetët, që bashkarisht t’I drejtohen Kuvendit në orën 16:30, pra 30 minuta përpara nisjes së seancës.

“Pavarësisht vendimit të përjashtimit arbitrar, i cili parashikon përjashtimin tonë për 11 ditë, ne duhet të jemi të gjithë në seancë. Për këtë qëllim, mblidhemi të gjithë bashkë në orën 16:30 për të shkuar në grup në seancë”, thuhet në mesazhin që Bardhi i ka drejtuar ligjvënësve opozitarë.

Nëse deputetët e opozitës do të mund të hyjnë në Kuvend, pritet që të veprohet njëlloj si 10 ditë më parë, kur nuk u lejua zhvillimi i seancës parlamentare, pasi deputetët e PD u ulën në vendet ku qëndronin ministrat, disa në foltore dhe të tjerë në vendin e Kryeparlamentares.

Por në anën tjetër, Garda pritet të aplikojë të njëjtën strategji si ajo e pak muajve më parë, kur deputetët e përjashtuar nuk u lejuan të hynin në sallën e seancave plenare.

Kështu pritet që në hyrje, të pozicionohen efektivë të Gardës, duke bllokuar kështu hyrjen e ligjhvënësve të përjashtuar në sallë. Në shkurt të 2023-it, në hyrjen e godinës së Kuvendit u stacionuan rreth 20 gardistë, që bllokuan hyrjen dhe në atë kohë nuk lejuan që në mjediset e brendshme të Parlamentit të hynin deputetët e përjashtuar.

Por që të realizohet ky skenar nga Garda, do të duhet që deputetët socialistë, të shkojnë në seancë përpara orës që Bardhi i kërkon deputetëve demokratë të jenë të pranishëm në sallë.

Kjo për faktin se do të bëhej e pamundur që gardistët të mund të pengojnë hyrjen në seancë të deputetëve të përjashtuar, nëse kolegët e tyre të së majtës apo të tjerë nga opozita do të zgjedhin të shkojnë në Kuvend pak përpara orës 17:00.

Mes deputetëve të përjashtuarve janë Sali Berisha, Gazmend Bardhi, Flamur Noka, Ina Zhupa, Bujar Leskaj, Edmond Spaho, Sajmir Korreshi, Luan Baçi, Tritan Shehu, Helidon Bushati etj.

Ish-kryeministri Sali Berisha ka deklaruar se Parlamentin nuk do e braktisin dhe do të jenë në seancën e së Hënës pavarësisht se ai dhe 22 deputetë të tjerë u përjashtuan nga Komisioni i Etikës.