Pasi hakerat i vodhën të gjitha sekretet, Policia e Shtetit me në krye Muhamet Rrumbullakun ka hapur një tender për sistemimin e të dhënave. Me datën 10 tetor 2022, në Agjencinë e Prokurimeve Publike është regjistruar një tender me objekt ”Mirëmbajtje DataCenter i Policisë së Shtetit”. Ky prokurim mban numrin e refencës REF-44050-09-30-2022 dhe sipas të dhënave për të do të paguhen 450 milionë lekë të vjetra. Në dokumente thuhet se “afati i instalimit të pajisjeve dhe realizimi i shërbimit do të brenda 90 ditësh nga lidhja e kontratës”.
Pra, do t’i duhen edhe 3 muaj të tjera Policisë që të marrë masa për të siguruar sistemin e të dhënave. Në dokumentin e publikuar nga Drejtoria e Policisë përcaktohet afati i prokurimit, objekti, por nuk jepen detaje se çfarë efekti do të kenë këto programe. Flitet se hakerat kanë fshirë një pjesë të mirë të të dhënave ose i kanë marrë dhe i kanë nxjerrë në shitje, por dokumentet standarde të tenderit nuk përmendin rikuperimin e sistemit.
Policia nuk pranon të jenë prekur të dhënat e sisitemit MEMEX, por hakerat duke përdorur kanalin “Homeland Justice” në rrjetin Telegram vazhdojnë të tronditin vendin me bërjen publike të të dhënave të qytetarëve dhe agjentëve të policisë. Ndërsa javë më parë janë publikuar pamje nga kamerat e ambienteve të brendshme të Drejtorive të Policisë në qarqe, si qelitë dhe zyrat. Në faqen e internetit “Homeland Justice” ekzistojnë disa publikime. Kujtojmë se, sistemet TIMS në pikat kufitare u prek në 9 shtator nga një sulm kibernetik.
Në fillim u raportuan probleme në sistemin TIMS në pikën kufitare të Kapshticës, ndërkohë më vonë u raportua për probleme dhe në pikën kufitare të Kakavijës dhe Rinasit. mQeveria, me sa duket qëllimisht për menaxhimin e kësaj krize, e ka ndarë sulmin kibernetik në platdormën e-Albania nga ai në sistemet e Policisë së Shtetit. Kësisoj, kemi një raport hetimor nga ekspertët e Microsoft dhe të FBI për sulmin në platformën e qeverisë, por nuk ka një hetim për atë që ka ndodhur në serverat e Policisë së Shtetit. Pas shumë publikimesh të të dhënave, Qeveria shqiptare i ka kërkuar Rusisë të byllë kanalin e hakerave në telegram.
Ndërsa, me kokëfortësi, Policia e Shtetit nuk pranon publikisht situatën dhe në mungesë transaparence dhe të një analize, po përpiqet “t’i ndreqë” gjërat me këtë tender. Ndërkaq, në mëngjesin e 10 tetorit presidenti Bajram Begaj zhvilloi një mbledhje me Këshillin e Sigurisë Kombëtare, ku fokusi i mbledhjes ishin sulmet kibernetike nga Irani. Nuk dihet çfarë vendimesh u ndërmorën në atë mbledhje, por vetëm një ditë më pas Policia e Shtetit hapi këtë tender./ Esmeralda Hida/
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post