Mjeku Edvin Prifti ka reaguar në lidhje me vendimin e GJKKO e cila nuk e pranoi kërkesën për heqjen e sekuestros preventive. Në një reagim në rrjetin social “Facebook”, mjeku ka pohuar se gjykata ka frikë të pranojë provat.
Sipas tij, gjykata nuk pati asnjë provë, por pranoi pretendimin e akuzës se paratë e depozituara kishin origjinë të dyshimtë. Prifti shprehet se me anë të fakteve ka provuar se paratë e tij janë të vendosura si rrjedhojë e punës e sakrificës.
“Gjykata nuk pati frike, kur pa asnje prove pranoi pretendimin e akuzës se kjo shume, e depozituar cash ne llogarite e mia, kishte origjine te dyshimte. Ku I gjete ti zotëri paratë në cash? Kjo ishte çështja që shtrohej ne maj.
Sot u përpoqa të tregoja se ku i gjeta, sa punova, sa sakrifica në çerek shekulli dhe sa taksa pagova! Për më se 4 muaj, avokatë ne Itali dhe auditues të pavarur në Shqipëri, mblodhën dokumentacionin ligjor për të ardhurat e mia ndër vite. Raporti i auditit ligjor dhe kontabël së bashku me gjithë dokumentacionin mbështetës, iu paraqit Gjykatës së Posaçme, duke i kërkuar të bënte gjënë më të thjeshtë, më ligjore dhe më logjike: të urdhëronte të gjitha verifikimet e nevojshme, qoftë edhe një auditim të ri dhe mbi këtë bazë të shqyrtonte mundësinë e heqjes së sekuestros sipas ligjit”, shkruan mjeku.
Ndër të tjera ai tregohet i vendosur se çdo e ardhur është krijuar në respekt të ligjit.
“Unë siguroj gjithkënd, si ata që më vlerësojnë, ashtu edhe ata që kanë kritika ndaj meje, se çdo të ardhur që unë kam patur dhe kam është siguruar duke respektuar ligjin, kudo ku kam punuar. Është skandal që kjo gjykatë nuk ka kurajon të japë asnjë garanci se është vërtet një gjykatë e pavarur. Tregoi se është peng i prokurorisë dhe se vendimi I saj absurd është tërësisht i paragjykuar”, thuhet në reagim.
Discussion about this post