Dy ekspertë të rinj janë vendosur nga Gjykata e Posaçme për shqyrtimin e pronave të Dritan Dajtit. Ky vendim vjen pas dorëheqjes së ekspertëve të mëparshëm. Ky ndryshim i fundit në çështjen “Dajti” nga ana e organit të posaçëm të akuzës, ka shtyrë seancën për më 3 dhjetor.
Më herët Prokuroria e Posaçme kërkoi konfiskimin e 6 pronave të Dritan Dajtit, që janë të regjistruara në emër të familjarëve të tij.
Gjyqi i Dritan Dajtit
Dritan Dajti, i akuzuari për vrasjen e katër punonjësve të Policisë së Shtetit në vitin 2009, i është shmangur burgimit të përjetshëm më 8 shkurt 2019 nga Gjykata e Shkallës së Parë për Krimet e Rënda, falë vendimit të dhënë nga Kolegji i Gjykatës së Apelit për Krimet e rënda, i përbërë prej pesë gjyqtarësh të komanduar nga Apeli i Shkodrës dhe i Vlorës. Gjyqtarët vendosën të pranojnë gjykimin e shkurtuar edhe pse çështja është në gjyq prej gati 10 vitesh dhe se Prokuroria e Krimeve të Rënda kishte kërkuar hetimin gjyqësor të çështjes dhe vetëm në Shkallën e Parë janë zhvilluar mbi 250 seanca gjyqësore. Më 8 shkurt, Gjykata e Apelit për Krime të Rënda konfirmoi zyrtarisht për BIRN se pesë gjyqtarët e lartpërmendur kishin vendosur që në bazë të nenit 406 të Kodit të Procedurës Penale të mëparshme, të ndihmonin Dajtin duke e dënuar përfundimisht me 25 vjet burg. Prej 10 vitesh seancat gjyqësore për shqyrtimin e çështjes ndaj Dritan Dajtit janë shtyrë në vazhdimësi. Ai ndodhet në paraburgim që prej vitit 2009 dhe me vendimin e fundit të gjykatës, Dajti mund të ketë kryer një pjesë të mirë të dënimit.
Discussion about this post