Sekuestrohen mbi 3 kile hashash dhe një armë gjahu në Dibër, shpallen në kërkim tre persona

Policia ka sekuestruar 3.3 kilogramë hashash në Dibër dhe për pasojë janë shpallur në kërkim 3 persona.

Mësohet se sasia e lëndës narkotike ishte në pronësi të shtetasve: Ndre Tusha 34 vjeç; Nikoll Kola 31 vjeç; Nikolin Ceka 63 vjeç, të tre banues në Mat.

Gjithashtu, u sekuestrua dhe një armë gjahu, në cilësinë e provës materiale.

Materialet procedurale i kaluan Prokurorisë, për veprime  të mëtejshme.

Njoftimi zyrtar i policisë:

Në vijim të operacionit policor të koduar “Stojani”, shërbimet e Policisë kanë marrë informacion se në territorin e fshatit Stojan, disa persona kishin kultivuar bimë narkotike. Mbi bazën e këtyre informacioneve është ushtruar kontroll i imtësishëm në territorin e fshatit Stojan, ku si rezultat i kontrollit nga forcat e posaçme Operacionale e “Shqiponja”, si dhe nga shërbimet e Komisariatit të Policisë Mat, është gjetur e paketuar sasia prej 3.3 kg lëndë e dyshuar narkotike canabis sativa, në forma boçeje.

Nga veprimet e para hetimore rezultoi se lënda narkotike e sekuestruar iu përkiste shtetasve Ndre Tusha 34 vjeç; Nikoll Kola 31 vjeç; Nikolin Ceka 63 vjeç, të tre banues në Mat, të cilët janë shpallur në kërkim. Në vijim të kontrolleve, në banesën e shtetasit N. C., është gjetur një armë gjahu e cila, së bashku me lëndën narkotike, u sekuestruan në cilësinë e provës materiale.

Më herët, në kuadër të operacionit “Stojani”, u sekuestruan 33 kg kanabis, u vu në pranga 1 shtetas dhe u shpall në kërkim vëllai i tij.

Vijon puna intensive për kapjen e shtetasve të shpallur në kërkim. Materialet procedurale i kaluan Prokurorisë, për veprime të mëtejshme.