Senatorja amerikane Elissa Slotkin ka reaguar lidhur me protestat dhe përshkallëzimin e tensioneve në Shqipëri, duke i bërë thirrje kryeministrit Edi Rama të mbrojë protestuesit nga përdorimi i tepruar i forcës policore, të respektojë shtetin e së drejtës dhe të luftojë korrupsionin.
Përmes një postimi në rrjetin social X, Slotkin ka përcjellë një mesazh për autoritetet shqiptare, duke theksuar se qeveria ka përgjegjësinë të garantojë të drejtën e qytetarëve për të protestuar paqësisht dhe t’u përgjigjet shqetësimeve të tyre.
Senatorja amerikane thekson se reagimi i saj vjen pas telefonatave të marra nga banorë të shtetit të Miçiganit, të shqetësuar për përshkallëzimin e dhunës në Shqipëri gjatë ditëve të fundit.
“Gjatë ditëve të fundit, kam marrë një sërë thirrjesh të shqetësuara nga banorë të Miçiganit lidhur me dhunën në përshkallëzim në Shqipëri, mes vendeve të tjera evropiane. Populli shqiptar ka të drejtë të protestojë paqësisht dhe të kërkojë llogari nga zyrtarët e tyre të zgjedhur”, shprehet Slotkin.
Në deklaratën e saj, senatorja ka vënë theksin te detyrimet e qeverisë shqiptare, duke kërkuar mbrojtjen e demonstruesve nga përdorimi i tepruar i forcës policore, luftimin e korrupsionit dhe respektimin e sundimit të ligjit.
“Në mënyrë të ngjashme, qeveria shqiptare ka për detyrë të respektojë sundimin e ligjit, të mbrojë protestuesit kundër përdorimit të tepruar të forcës policore, të pastrojë korrupsionin dhe t’i përgjigjet shqetësimeve të qytetarëve. I bëj thirrje të dyja palëve të bëjnë çmos për të ulur tensionet dhe për të gjetur një rrugë paqësore për të ecur përpara”, shkruan senatorja amerikane.
Krahas kërkesave drejtuar qeverisë, Slotkin u ka bërë thirrje edhe protestuesve që të kontribuojnë në uljen e tensioneve, duke theksuar rëndësinë e një zgjidhjeje paqësore.
Discussion about this post