Protestat antiqeveritare në Serbi vijuan edhe sot, me demonstrues që bllokuan Pallatin e Drejtësisë në Novi Sad në shenjë pakënaqësie për arrestimet e fundit. Bllokada nisi pas orës 6:00 të mëngjesit dhe studentët e pranishëm deklaruan se ishte një akt rezistence “kundër arrestimeve të pabaza dhe dhunës ligjore” ndaj kolegëve dhe miqve të tyre.
Tubime të tjera u mbajtën edhe në Beograd, Valjevë, Obrenovac dhe Sremska Mitrovica. Në Beograd, demonstruesit shkatërruan ambientet e Partisë Progresive Serbe në Palilula dhe Zemun, ndërsa pas ndërhyrjes së policisë, në një prej tyre shkoi edhe presidenti Aleksandër Vuçiç.
Përballë situatës, presidenti Vuçiç ka thirrur Këshillin e Sigurisë Kombëtare, ku marrin pjesë Kryetarja e Kuvendit Ana Brnabiç, Kryeministri Duro Macut, Ministri i Mbrojtjes, Drejtori i BIA-s, Ministri i Punëve të Brendshme dhe krerët e lartë të autoriteteve policore dhe gjyqësore.
Demonstruesit vijojnë të shprehin pakënaqësinë për arrestimet dhe dhunën policore, ndërsa autoritetet monitorojnë situatën në qytetet kryesore të vendit.
Discussion about this post