Pas votimit të mocionit të mosbesimit ndaj qeverisë së Malit të Zi, Presidenti malazez Milo Gjukanoviç sqaroi se partia e tij do të mbështesë çdo qeveri që do të ruajë karakterin qytetar dhe laik të vendit. Në një intervistë për DW, Gjukanoviç tha se vendi i tij tani është në proces të konsolidimit të pushtetit. Sipas tij, interesi më i madh i Malit të Zi është që sa më shpejt të ketë një qeveri të përgjegjshme.
“Çdo qeveri që do të ruajë karakterin qytetar dhe laik të vendit, do të promovojë demokracinë multietnike dhe do të kontribuojë në zhvillimin dinamik ekonomik, në mënyrë që Mali i Zi, si një vend i zhvilluar demokratikisht dhe ekonomikisht, të jetë pjesë e Bashkimit Evropian në të ardhmen e afërt. Do të ishte shumë e rrezikshme për Malin e Zi, nëse koalicioni qeverisës bëhet kaq i varur nga nacionalizmi serbomadh” – tha Gjukanoviç.
Më tej ai ka thënë se qeveria e deritanishme përbëhej nga tre koalicione, ku njëra prtej tyre koalicion i profilizuar qartë i Serbisë së Madhe. Ai shprehet se fal opozitës shtetformuese, Mali i Zi arriti t’i rezistojë ofensivës së Beogradit.
“Njëra prej të cilave është koalicion i profilizuar qartë i Serbisë së Madhe. Ne kemi menduar, se nëse një qeveri e tillë përcakton politikën shtetërore, kjo do të ishte shumë e rrezikshme për Malin e Zi. Mendoj se falë nesh, falë opozitës shtetformuese, Mali i Zi arriti t’i rezistojë ofensivës së Beogradit. Pas 30 gushtit përjetuam një ofensivë shumë agresive nga Beogradi. Nacionalizmi serbomadh nga Beogradi kuptoi se fitorja e të preferuarve të tyre hapi derën për një aneksim të ri të Malit të Zi, këtë herë përmes projektit “Bota Serbe”. Kjo nuk ndodhi sepse kishim një opozitë me përgjegjësi shtetërore të drejtuar nga DPS” – është shprehur ai.
Pas rrëzimit të qeverisë të Malit të Zi, zyrtarët kanë hedhur hipotezat e tyre për një emër të ri të kryeministrit të ardhshëm të vendit, ku më i përmenduri duket se është zëvendëskryeministri Dritan Abazoviç.
Discussion about this post