Ditën e sotme ka nisur protesta e radhës kundër rritjes së çmimit të bukës dhe ushqimeve të tjera bazë. Në deklaratën e tij një nga nismëtarët e protestës, Rigels Xhemollari tha se ata do të vazhdojnë të këmbëngulin për kërkesat e tyre dhe do të negociojnë me qeverinë, vetëm nëse iu plotësojnë tre kërkesat e tyre.
Sakaq, ai u shpreh se do të kishte më shumë protestues nëse nuk do i kërcënonin me heqje nga puna.
“Vijojmë t’i mbetemi kërkesave tona që kemi artikuluar që ditën e parë. Uljen e TVSH-së për ushqimet e shportës në masën e rajonit. Nuk kërkojmë heqjen e TVSH për produktet siç ka premtuar Rama, por të paktën të shkojë në nivelin e rajonit. Ka shumë të punësuar të administratës që duan të protestojnë por nuk vijnë dot këtu se i heqin nga puna. Do jemi përsëri në protestë derisa të gjendet një zgjidhje
Patjetër që do të ishim të gatshëm për të negociuar me qeverinë. Ne kemi nevojë për 3 gjëra. Ulje e çmimit të produkteve të shportës, çmimit të gazit dhe naftës”, tha ai.
Protesta e parë është zhvilluar me 6 tetor, vetëm disa ditë pasi kryeministri Edi Rama deklaroi se jemi krizë energjetike dhe kjo do të përkthehet në rritjen e faturave. Ndërsa më parë ishte rritur çmimi i bukës dhe i produkteve bazë. Sipas protestuesve kjo është e patolerueshme, por të marrësh për bazë të ardhurat e një familje shqiptare. Çdo të hënë ata kanë dalë në protesta ku i kërkojnë qeverisë, reduktimin në 6% të TVSH për shportën bazë, heqjen e akcizës për naftës dhe uljen e çmimit të gazit.
