Egnatia rikthehet këtë mbrëmje në arenën europiane, ku në orën 21:00 do të përballet në transfertë me Shamrok Rovers në ndeshjen e parë të raundit të tretë të Ligës së Europës. Kampionët e Shqipërisë synojnë të hedhin një tjetër hap drejt një kualifikimi historik, pas paraqitjeve mbresëlënëse të deritanishme.
Skuadra e drejtuar nga Nevil Dede vjen në këtë sfidë me moral të lartë, pasi në katër ndeshjet e luajtura këtë sezon në kupat e Europës nuk ka pësuar asnjë humbje brenda kohës së rregullt. Fitorja 6-1 ndaj Petrokubit dhe barazimet përballë Çeljes kanë rritur besimin se Egnatia mund të rivalizojë me çdo kundërshtar.
Objektivi kryesor në Dublin është të merret një rezultat pozitiv që do ta mbante të hapur çështjen e kualifikimit për ndeshjen e kthimit në “Arena Egnatia”.
Stafi teknik pritet të zgjedhë një qasje të kujdesshme, me një skuadër të organizuar në mbrojtje dhe të gatshme të godasë në kundërsulm.
Pavarësisht mungesave në organikë, te kampionët shqiptarë mbizotëron optimizmi.
Një barazim apo edhe një fitore minimale do ta vendoste Egnatian në një pozicion të favorshëm për sfidën e kthimit, ku synimi mbetet vazhdimi i ëndrrës europiane.
Discussion about this post