Trajneri i Partizanit, Ilir Daja ka thënë se këtë herë skuadra e tij do të bëjë kthesë në ndeshjen e kësaj të diele kundër Kukësit.
Duke folur në konferencë për mediat në prag të sfidës që do të hap dyert e stadiumit ‘Air Albania’ për këtë sezon të Superligës, Daja ka theksuar se ndonëse ‘Verilindorët’ janë në super formë, djemtë e tij kanë për të marrë tre pikë.
“Është një skuadër që me lojë ka justifikuar pikët, pasi ka instaluar një manovër që përfshihen gjithë lojtarët dhe meritë ka stafi i tyre. Kanë lojë të mirë në tranzicione, por si çdo ekip, edhe Kukësi ka pikat jo të forta. Nesër nuk do e marrim ndeshjen me stres dhe do hyjmë me qetësi në fushë.”-theksoi tekniku.
Ndërsa më tej shtoi edhe se pushimi i gjatë për shkak të ndeshjeve të Kombëtares i ka ndihmuar kryeqytetasit, pasi Zhunior, Kaçe dhe Musta janë rikuperuar dhe janë të gatshëm të luajnë.
“Kjo periudhë pushimi ka të mirën e vet me rikuperimin, ndërsa ka edhe të keqen sepse kemi pasur lojtarë me ekipin U-21 dhe na janë kthyer vonë. Zhunior, Kaçe dhe Musta janë rikuperuar dhe janë bashkuar me grupin. Kjo periudhë na ka dhënë mundësinë për të rikuperuar, me tre lojtarët më sipër që do e nisin ndeshjen nga minuta e parë.”-shtoi ai.
Sfida me Kukësin do të zhvillohet të dielën (nesër) në orën 16:45, teksa pritet të ketë edhe pjesëmarrje të lartë tifozësh në stadium./K.T/Gijotina.com
