Partizani do të luajë këtë të shtunë në transfertë me Skënderbeun për javën e dytë të Superligës.
Ndërsa ka dalë në konferencë për mediat në prag të këtij takimi, trajneri Ilir Daja është shprehur se nga ky takim synohet vetëm një gjë, marrja e 3 pikëve.
“Është ndeshje delikate, duhet patjetër të shkojmë drejt 3 pikëshit. I kemi kualitetet e duhura për të bërë këtë gjë. Ajo që më pëlqeu në ndeshjen e parë ishte motivimi që kishin lojtarët dhe të dëshira për të fituar, përtej gjërave të tjera që duhen përmirësuar. Mendoj që kualiteti nuk na mungon. Në javën e dytë mund të behet diçka më shumë. Skënderbeu është një ekip simpatik, që vjet në pjesën e dytë të kampionatit ka bërë mirë. Pjesa më e madhe janë lojtarë të rinj. Duhet të jesh gjatë gjithë kohës i kujdesshëm. Duhet të jemi të motivuar maksimalisht, nëse duam të arrijmë marrjen e 3 pikëve.”-u shpreh ai.
Më tej ndërsa ka folur për stadiumin e ri, tekniku i ‘Demave’ dha një lajm shumë të mirë për mbështetësit e skuadrës së tij, teksa thekson se pritet të jetë gati nga mesi i tetorit.
“Mendojmë që të paktën nga mesi i tetorit të fillojmë stërvitjet me ekipin në fushën e kompleksit të ri. Për këtë kemi marrë dhe fjalën e presidentit. Ndërsa për ta bërë komplet stadiumit të gatshëm për të pritur ndeshjet tona, besoj se në muajin nëntor. Unë jam trajneri i ekipit, nuk jam presidenti, por sipas fjalës së tij besoj që muaji nëntor duhet të na gjejë në stadiumin e ri. Gjithmonë në qoftë se nuk na hapet ndonjë vështirësi tjetër, sepse këtu në Shqipëri, në vend që të suportohen investime të tilla gjigante, në çdo hap që investohet del nga një problematikë. Shpresoj që fundi i nëntorit të na gjejë në stadiumin tonë”.- tha ndër të tjera Ilir Daja./K.T/Gijotina.com
