Anëtari i vetëm shqiptar etnik i parlamentit të porsazgjedhur serb, Shaip Kamberi, i bëri thirrje Beogradit të vendosë sanksione ndaj Rusisë për veprimet e saj në Ukrainë. Përveç Bjellorusisë, Serbia është i vetmi vend në Europë që ende nuk e ka hedhur një hap të tillë, pavarësisht thirrjeve të vazhdueshme nga Bashkimi Europian. Madje një sondazh i fundit e nxirrte Vladimir Putinin si liderin më të pëlqyer prej serbëve.
“Krijimi i Parlamentit dhe qeverisë së re të Serbisë duhet të shoqërohet me sanksione kundër Rusisë, në përputhje me politikën e jashtme të Bashkimit Europian” – ka shkruar Kamberi në profilin e tij në Facebook.
Ai shtoi se si përfaqësues i Koalicionit Shqiptar për Luginën e Preshevës po punon për krijimin e një grupi parlamentar me parti të tjera opozitare dhe minoritare, e madje e bëri dhe një paralajmërim, duke thënë se nëse propozimi i tij për sanksione nuk pranohet, nuk do të votojë për legjislaturën e re.
Zgjedhjet e përgjithshme në Serbi u zhvilluan në muajin prill, por vendin e tij në parlament Kamberi e fitoi vetëm javën e kaluar pas raundit të pestë të përsëritur zgjedhor. Rezultatet fillestare të zgjedhjeve të 3 prillit ishin zhgënjyese për shqiptarët që humbën të tre vendet e fituara në zgjedhjet e mëparshme.
Me fitoren e Kamberit, lista e shqiptarëve siguroi një mandate në Parlamentin e Serbisë, që në fakt është një votë opozitare, e vetmja e cila mund të flasë drejtpërdrejt në emër të pakicës kombëtare shqiptare.
Discussion about this post