SHBA dhe një mori vendesh aleate u kanë bërë thirrje talebanëve që t’i japin fund vrasjeve të synuara të ish-anëtarëve të forcave afgane të sigurisë.
Në një deklaratë të përbashkët, 22 vendet kërkuan që regjimi islamik të respektojë zotimin e tij për të mos dëmtuar ish-qeverinë ose personelin e sigurisë.
“Ne jemi thellësisht të shqetësuar nga raportimet për vrasje dhe zhdukje të detyruara”, thuhet në deklaratë.
I publikuar nga Human Rights Watch në fillim të kësaj jave, raporti dokumentoi më shumë se 100 ekzekutime dhe rrëmbime të ish-zyrtarëve të qeverisë afgane që kur talebanët morën kontrollin e vendit gati katër muaj më parë. Ai gjithashtu dokumentoi vrasjen e 47 anëtarëve të forcave afgane të sigurisë që u dorëzuan ose u kapën nga talebanët midis 15 gushtit dhe 31 tetorit. Kjo pavarësisht nga garancia e regjimit se punonjësit e qeverisë së mëparshme nuk do të dëmtoheshin.
Deklarata e shkurtër e përbashkët u lëshua nga SHBA dhe u nënshkrua nga Mbretëria e Bashkuar, Bashkimi Evropian dhe 19 vende të tjera. Këto vendve nënvizuan shqetësimet e tyre të thella lidhur me gjetjet e raportit dhe i bënë thirrje të gjitha rasteve të vrasjeve jashtëgjyqësore dhe zhdukjeve të detyruara që të hetohen plotësisht.
“Ne do të vazhdojmë të masim talebanët me veprimet e tyre”, përfundon deklarata.
Ka pasur shumë raste të veprimeve të talebanëve që kundërshtojnë atë që ata kanë premtuar, dhe raportet e mëparshme humanitare kanë zbuluar gjithashtu vrasje të synuara.
Në gusht, një raport i publikuar nga Amnesty International zbuloi se 300 luftëtarë talebanë udhëtuan në një zonë pranë fshatit Dahani Qul më 30 gusht, ku ish-ushtarët e qeverisë po qëndronin me familjet e tyre.
Raporti thotë se luftëtarët ekzekutuan nëntë nga ushtarët pasi ata ishin dorëzuar tashmë, dy të tjerë vdiqën në shkëmbim zjarri dhe dy civilë të tjerë u vranë gjithashtu gjatë luftimeve që pasuan, duke përfshirë një vajzë 17-vjeçare.
Discussion about this post