Ambasada e Shteteve të Bashkuara të Amerikës dhe Bashkimi Europian, kanë dalë me një deklaratë të përbashkët ku kanë shprehur mbështetjen e tyre në vijimin e procesit të vetingut në kuadër të reformës në drejtësi në Shqipëri. Delegacionet e huaja shprehen se Shqipëria ka bërë hapa domethënës në reformat e anëtarësimit në BE. Ata kanë thënë se ndër hapat më të vështirë por thelbësorë, ka qenë miratimi dhe zbatimi i reformës në drejtësi.
“Gjatë viteve të fundit, Shqipëria ka bërë përparime domethënëse në reformat e anëtarësimit në BE. Ata mbështesin vijimin e vetingut për gjyqtarët dhe prokurorët teksa i bëjnë thirrje partive politike që të votojnë projektligjin për zgjatjen e mandatit të organeve të vetingut. Ndër hapat më të vështirë, por thelbësorë, ka qenë miratimi dhe zbatimi i reformës në drejtësi. Jemi në një moment të rëndësishëm pasi reforma në drejtësi po jep rezultate. Vetingu i gjyqtarëve dhe prokurorëve është një element themelor i reformës në drejtësi. Për t’u mundësuar institucioneve të vetingut të kryejnë misionin e tyre, është i nevojshëm ndryshimi i kushtetutës për ta zgjatur mandatin e tyre për një periudhë të kufizuar. Komisioni i Venecias konfirmoi se zgjatja e propozuar është në përputhje me standardet evropiane dhe është e nevojshme për të garantuar barazinë para ligjit dhe sigurinë juridike” – thuhet në deklaratën e delegacioneve.
Më tej ata shprehen se zgjatja e propozuar e vetingut mbështetet fuqishëm nga miqtë e Shqipërisë që dëshirojnë ta shohin Shqipërinë në BE sa më shpejt të jetë e mundur. Ata gjithashtu thonë se çështja e vetingut në drejtësi nuk është çështje partiake, por çështje e interesit kombëtar.
“Zgjatja e propozuar e vetingut mbështetet fuqishëm nga miqtë e Shqipërisë që dëshirojnë ta shohin Shqipërinë në BE sa më shpejt të jetë e mundur. Kjo nuk është çështje partiake. Shpresojmë që të gjithë deputetët – pavarësisht nga përkatësia partiake – ta shohin këtë si një çështje të interesit kombëtar dhe të votojnë në përputhje me të. ashtu siç kane mbështetur gjithmonë rrugën evropiane të Shqipërisë. Vota për zgjatjen e vetingut është votë për të ardhmen e Shqipërisë në BE” – mbyllet deklarata e BE-së dhe SHBA-së.
Discussion about this post