Pak ditë më parë, Departament Amerikan i Shtetit shpalli “non grata” Ramiz Merkon, kryetar i Komunës së Strugës në Maqedoninë e Veriut. Në njoftimin e Departamentit të Shtetit thuhet se kryetari i komunës së Strugës, ka shpërdoruar fondet dhe ka ndërhyrë në procese gjyqësore dhe procese të tjera publike, duke dëmtuar besimin e publikut ndaj institucioneve demokratike të Maqedonisë së Veriut.
Lidhur me këtë vendim, një reagim është përcjellë sot nga Ramiz Merko, me anë të një statusi në rrjetin social Facebook. Ai thekson se pas vendimit, nuk ka dashur të komunikojë në të mirë të proceseve, për të cilat thotë se do të jetë i hapur si çdo herë në përkrahje të drejtësisë, dhe për secilin proces në organet e drejtësisë nga ana e institucionit të Komunës së Strugës. Ai e mbyll mesazhin duke theksuar se në të mirë të procesit, ka vendosur që secilin aktivitet në strukturat partiake ta ngrijë, deri në mbylljen e proceseve të rëndësishme për të gjithë.
Postimi i plotë
“Që nga Presidenti Uillson e deri më sot, Shtetet e Bashkuara të Amerikës janë aleati ynë në çdo sfidë dhe bashkë kemi realizuar shume projekte të rëndësishme për vendin, qytetin dhe qytetarët e Strugës.
Mbështetjen vijuese amerikane për vendin tonë dhe qytetarët e Strugës e mirëpres dhe e përkrah gjithmonë. Pas zhvillimit të fundit në lidhje me vendimin e Departamentit të Shtetit Amerikan, nuk kam dashur të komunikoj në të mirë të proceseve për të cilat do të jem i hapur si çdo herë në përkrahje të drejtësisë dhe për secilin proces në organet e drejtësisë nga ana e institucionit të Komunës së Strugës dhe nga ana ime do të dorëzohet në kohë sa më të shpejt ashtu siç kam qënë transparent çdo herë për organet e drejtësisë dhe gjithë institucionet e tjera. Për këtë, në të mirë të procesit, vendosa që secilin aktivitet në strukturat partiake ta ngrij deri në mbylljen e proceseve të rëndësishme për të gjithë.
Për fund dua të falenderoj secilin qytetar për mbështetjen ndër vite por dhe mbështetjen të cilën nuk e kanë kursyer dhe këto ditë të cilët jam i bindur se bashkërisht do i kalojmë, në funksion të krijimit të kushteve për një jetë sa më të mirë të qytetarëve të Strugës dhe jo vetëm, për Strugën që e duam.
Discussion about this post