SHBA/ Presidenti Trump nënshkruan ligjin për publikimin e dosjeve të Epstein

Presidenti Donald Trump ka nënshkruar ligjin që detyron Departamentin e Drejtësisë të publikojë dokumentet e lidhura me Jeffrey Epstein.

Në një postim në Truth Social, Trump shkroi: “Sapo e kam nënshkruar projektligjin për të liruar dosjet e Epstein!”, duke shoqëruar njoftimin me kritika ndaj demokratëve, të cilët sipas tij po e përdorin çështjen Epstein për të devijuar vëmendjen nga “fitoret tona të mëdha”.

Nënshkrimi i ligjit u bë pasi Senati finalizoi procedurat dhe ia dërgoi atë Shtëpisë së Bardhë, pasi më herët ishte miratuar me shumicë dërrmuese në Dhomën e Përfaqësuesve.

Sipas ligjit të ri, Departamenti i Drejtësisë ka 30 ditë kohë për të bërë publike dokumentet që lidhen me Epstein, financuesin e dënuar për abuzim me të mitur.

Gjatë fushatës së vitit të kaluar, Trump ishte zotuar se do t’i publikonte të gjitha dosjet e Epstein, edhe pse më vonë i cilësoi ato si një “mashtrim” të demokratëve. Lidhjet e tij të mëhershme me Epstein kanë qenë në qendër të vëmendjes për vite me radhë, por ai ka mohuar vazhdimisht çdo shkelje.

Qëndrimi i tij ndryshoi papritur fundjavën që lamë pas, kur ai u bëri thirrje republikanëve në Kongres të mbështesnin Projektligjin për Dosjet Epstein, duke lënë të kuptohet se do ta nënshkruante.

“Për shkak të kësaj kërkese, votat ishin pothuajse unanime”, shkroi ai në njoftimin e mbrëmjes.

Në Dhomën e Përfaqësuesve ligji u miratua me 427 vota pro dhe vetëm një kundër, një rezultat që u prit me duartrokitje. Senati konfirmoi menjëherë se do ta votonte gjithashtu.

Në postimin e tij, Trump e paraqet vazhdimisht Epstein si të lidhur me demokratët, duke përmendur marrëdhëniet e tij të kaluara me figura të tilla si Bill Clinton. Ai ka kërkuar që Departamenti i Drejtësisë të hetojë gjithashtu lidhjet e Epstein me Clintonin, ish-sekretarin e Thesarit Larry Summers dhe themeluesin e LinkedIn, Reid Hoffman, një donator i njohur demokrat.

Të tre emrat figurojnë në 20,000 dokumente të tjera të publikuara javën e kaluar nga Komiteti Mbikëqyrës i Dhomës së Përfaqësuesve, megjithëse asnjëri prej tyre nuk është akuzuar për shkelje.

Ndërkohë, Larry Summers njoftoi të mërkurën se do të tërhiqej nga jeta publike, duke deklaruar se ndihej “thellësisht i turpëruar” për marrëdhënien e tij me Epstein.