Ambasada Amerikane ka dalë sot me një paralajmërim mjaft të fortë, në lidhje me debatet e fundit për hartën e re gjyqësore. Procesi i vettingut ka lënë boshllëqe në disa gjykata dhe për këtë arsye është sugjeruar nga KLGJ që disa gjykata të shkrihen dhe të ketë vetëm një Gjykatë Apeli.
Mirëpo kjo ka sjellë përplasje mes Këshillit të Lartë Gjyqësor dhe Ministrisë së Drejtësisë të cilat nuk bien dakord për miratimin e kësaj harte.
Duke qenë se debatet vijojnë dhe koha nuk pret, SHBA ka dalë sot me një reagim zyrtar, ku përmes një postimi në faqen zyrtare të Ambasadës shkruan se, harta e re gjyqësore duhet për të riorganizuar sistemin gjyqësor.
Gjithashtu, Ambasada vë në dukje se duhen adresuar sa më parë vendet vakante gjyqësore që erdhën si rezultat i procesi të nevojshëm për Shqipërinë të vettingut dhe t’i jepet fund kësaj problematike që po cenon qëndrueshmërinë e reformës në drejtësi.
“Plotësimi i hapësirave të krijuara nga vettingu është një hap tjetër i nevojshëm në procesin e reformës në drejtësi dhe duhet të jetë prioritet. Ambasada Amerikane mbështet fuqimisht miratimin e një harte të re gjyqësore për të riorganizuar sistemin gjyqësor dhe për të adresuar vendet vakante gjyqësore që erdhën si rezultat i procesi të nevojshëm për Shqipërinë të vettingut.
Takimi i kësaj jave i Grupit të Punës Ndërinstitucional për Hartën e Re Gjyqësore shfaqi përparim të madh drejt një konsensusi që do t’u sigurojë qytetarëve të Shqipërisë një sistem gjyqësor funksional, efikas dhe të hapur. Ambasada Amerikane ka kënaqësinë të sigurojë mbështetje teknike për këtë proces të rëndësishëm përmes projektit tonë për zvogëlimin e numrit të çështjeve të prapambetura dhe përmirësimin e efikasitetit në Gjykatën e Lartë të Shqipërisë, të financuar nga Byroja e Departamentit të Shtetit për Çështjet Ndërkombëtare të Narkotikëve dhe Zbatimit të Ligjit”, thuhet në njoftim.
Sakaq, kujtojmë se ditën e djeshme SHBA kërkoi që palët politike të bien në konsensus për të shtyrë mandatin e vettingut brenda këtij viti.
E.H/ gijotina.com/
