Shtetet e Bashkuara të Amerikës kanë vendosur sanksione të reja ndaj pesë individëve dhe një kompanie, të cilët akuzohen për ndihmën që i kanë ofruar presidentit të Republika Srpska (RS) në Bosnjë e Hercegovinë, Millorad Dodik, dhe familjes së tij për pasurimin e paligjshëm.
Sanksionet kanë për qëllim të luftojnë përfitimet financiare të paligjshme që vijnë nga lidhjet e ngushta me Dodik, në dëm të popullit të Bosnjë-Hercegovinës.
Në një njoftim të Departamentit të Thesarit të SHBA, u bë e ditur se janë vendosur sanksione gjithashtu ndaj tetë individëve që ishin përfshirë në organizimin e festimeve të ditës antikushtetuese të RS-së në fillim të këtij viti.
Këta individë akuzohen për planifikimin dhe organizimin e aktiviteteve që rrezikojnë stabilitetin rajonal dhe shkelin marrëveshjet ndërkombëtare.
Ndër personat e sanksionuar janë Pavlo Çoroviç, bashkëshorti i vajzës së Dodikut, Radmila Bojaniç, Nemanja Reljinin dhe Sinisha Dodiku, të cilët akuzohen për përfitime të paligjshme financiare përmes lidhjeve të ngushta me presidentin Dodik.
Po ashtu, në listën e zezë janë përfshirë edhe zyrtarë të tjerë të lartë të RS, përfshirë ministrin e Punëve të Brendshme Sinisha Karan, që kanë ndihmuar në organizimin e aktiviteteve që minojnë paqen dhe stabilitetin e Bosnjë-Hercegovinës.
Në një deklaratë, Departamenti i Shtetit të SHBA theksoi se Dodik dhe familja e tij kanë përdorur pozitat e tyre për të krijuar pasuri personale përmes kompanive të lidhura me ta, duke fshehur aktivitetet e paligjshme dhe shmangur sanksionet ndërkombëtare.
“Dodik ka shfrytëzuar pushtetin për të siguruar pasuri për vete dhe për familjen e tij në dëm të qytetarëve të Bosnjë-Hercegovinës,” thuhet në deklaratën e Departamentit të Shtetit.
Vendimi për këto sanksione vjen pas një urdhri të Presidentit amerikan Joe Biden, i cili ka zgjeruar një urdhër ekzekutiv për Ballkanin Perëndimor, duke përfshirë individë dhe entitete që paraqesin kërcënime për stabilitetin rajonal dhe minojnë marrëveshjet e paqes.
Kujtojmë se Presidenti i Republikës Srpska, Milorad Dodik deklaroi këtë javë se entiteti i tij ka të drejtë të bashkohet me Serbinë, duke i bërë një paralelizëm me pretendimet e presidentit të SHBA-së, Donald Trump, për të drejtat e SHBA-së mbi Grenlandën. Këto komente ai i bëri në një intervistë për RT Balkan, degën ballkanike të kanalit televiziv rus Russia Today.
Dodik, i cili është një mbështetës i fortë i presidentit rus Vladimir Putin, riafirmoi idenë e tij për shkëputjen e Republikës Srpska nga Bosnjë e Hercegovina dhe bashkimin e saj me Serbinë. Ai theksoi se kufijtë ekzistues nuk janë të shenjta dhe i referoi proceset e njohjes së pavarësisë të shteteve që shpallen pas shpërbërjes së ish-Jugosllavisë.
“Si mund të mos bashkohet tani Republika Srpska me Serbinë, kur Grenlanda dhe Kanadaja e bënë këtë, apo kur ndodhi ribashkimi i Gjermanisë Lindore dhe Perëndimore?”, tha Dodik. Ai po ashtu komentoi mbi ngjarjet e fundit ndërkombëtare, duke përmendur se, nëse nuk do të kishte shpërthyer lufta në Ukrainë, Rusia mund të ishte ndarë në disa shtete më të vogla që do të ishin nën kontrollin e kompanive shumëkombëshe.
Dodik gjithashtu vazhdoi të mbështeste Putinin, duke thënë se ky i fundit kishte mbështetjen e popullit të tij dhe ishte mjaft i vendosur për të parandaluar një ndarje të tillë të Rusisë.
Discussion about this post