Presidenti i sapo zgjedhur Donald Trump, ka emëruar Guvernatorin e Dakotës së Veriut Doug Burgum për të drejtuar Departamentin e Brendshëm, ndërsa kabineti i tij i ri vazhdon të marrë formë.
Ky departament është përgjegjës për menaxhimin dhe ruajtjen e pjesës më të madhe të tokës në pronësi të qeverisë federale së bashku me burimet natyrore.
Trump njoftoi të premten se Burgum do të drejtojë një Këshill Kombëtar të Energjisë që do të krijohet për të ndihmuar vendin që të “domininojë në çështje të energjisë” në mbarë globin.
“Në këtë rol zoti Burgum do të drejtojë një strukturë që shtrihet në të gjitha agjencitë e degës ekzekutive, të përfshira në çështje që lidhen me lejet për energjinë, prodhimin, shpërndarjen, transportin dhe rregulloret në këtë fushë”, u shpreh Trump nënjë deklaratë. Si kryetar i Këshillit Kombëtar të Energjisë, Doug Burgum do të ketë një vend në Këshillin e Sigurisë Kombëtare, tha presidenti i zgjedhur.
Doug Burgum, 68 vjeç, është guvernator me dy mandate i Dakotës së Veriut. Një ish-drejtues ekzekutiv i një kompanie programesh kompiuterike e miliarder, ai u zgjodh për herë të parë në postin e guvernatorit në vitin 2016 dhe u rizgjodh edhe në vitin 2020 citon VOA.
Burgum, në pozicionin e tij të ri, pritet të jetë një aleat i fortë i përpjekjeve të Trump për të vënë në dispozicion toka publike për kërkime për naftë, gaz e minerale.
Discussion about this post