SHBA, ujëvara kthehet në… “llavë”

Një fenomen i rrallë natyror habiti vizitorët në Parkun Kombëtar Yosemite të mërkurën në mbrëmje.

Uji që rrjedh nga Ujëvara Horsetail në skajin lindor të faqes së shkëmbit El Capitan kapi në mënyrë të përkryer dritën e diellit që perëndonte, duke e lënë atë të ndezur në të kuqe e që ngjante me flakë që rridhnin nga shkëmbi. Ngjarja, e njohur si ‘zjarri’ ndodh në park vetëm në ditë të caktuara nga fundi i shkurtit, kur perëndimi i diellit ndriçon ujëvarën.

Turma spektatorësh mund të shiheshin duke parë me habi nga kjo pamje, ndërsa fotografë profesionistë dhe amatorë me kamerat e montuara kapnin foto.

“Kur dielli bie në këndin e saktë të duhur, ai reflekton mbi El Capitan”, tha për AFP oficeri i marrëdhënieve publike për Parkun Kombëtar Yosemite Scott Gedimann.

“Është një kombinim i diellit që reflekton mbi ujë, qiellit të pastër, ujit që rrjedh. Nëse e gjithë kjo bashkohet, është magjike”, shtoi ai.

Fenomeni zgjat vetëm disa minuta, gjatë kohës kur këndi i dritës është i duhuri. Ujëvarat është 650 m e lartë dhe rrjedh vetëm në dimër kur ka rënë mjaft borë dhe temperaturat kanë qenë të ngrohta për ta shkrirë.