Shehi flet për merkaton: Ky është plani ynë për janarin

Këtë të martë Tirana do të ndeshet me Kastriotin për raundin e 12 të Superligë, në takimin që do të zhvillohet në orën 16:45 në ‘Air Albania’.

Përpara kësaj sfide trajneri i kryeqytetasve, Orges Shehi u shpreh se edhe në këtë takim nuk do të rikthehet Redon Xhixha, i cili është i dëmtuar.

“Fitorja na kthen aty ku do të donim, është një fitore që ka vlera dhe gjendja e skuadrës është e mirë. Ndeshjen e kaluar humbëm Najdovskin dhe presim përgjigjen sa do të na mungojë. Na mungon edhe Xhixha me Përgjonaj.”-tha ai.

Më tej tekniku i ‘Bardhebluve’ shtoi se skuadra e krutanëve duhet marrë shumë seriozisht pavarësisht se në renditje qëndron në vend të fundit të tabelës.

“Duhet përqendrim dhe vlerësim maksimal, pavarësisht ku ndodhet ekipi kundërshtar në renditje. Kemi një panoramë të qartë për kundërshtarët sepse kemi luajtur me ta. Kastrioti do vlerësim, duhet të bëjmë maksimumin. Të futemi në fushë me idenë se nuk e dimë pozicionin e tyre apo çka ndodhur fazën e parë. Jemi të kënaqur për çka po bëjmë në fushë, të vijojmë me këtë lojë. Lojtarët tanë njohin mirë njëri-tjetrin. Shpresojmë që nga dita në ditë të bëjmë përmirësim.”-theksoi Shehi.

Në fund ai foli edhe për merkaton, ku theksoi se në janar pritet të bëhen afrime të rëndësishme.

“Kalendari nuk të lë kohë për të punuar. Kemi panoramë të qartë për çdo ekip dhe këto ditë në dispozicion të punojmë nga ana teorike, sepse nuk ka kohë. Për merkaton është shpejt, kemi lojtarë dhe ekip të mirë. Janari nuk të jep shumë mundësi për lojtarë që duam për përmirësim ku kemi nevojë. Nëse nuk gjejmë lojtarët e duhur, jemi mirë.”-tha Orges Shehi./K.T/Gijotina.com