Orges Shehi mendon se barazimi ishte rezultati i drejtë që prodhoi fusha e lojës në ndeshjen mes Vllaznisë dhe Partizanit, teksa u shfaq i kënaqur me atë që pa nga skuadra e tij në këtë transfertë.
“Futbolli ka të tre rezultatet brenda. Ne kërkuam që të dalim gjithmonë fitimtarë dhe kërkuam të ushtrojmë presion. Nuk ishim të kënaqur me barazimin, deshëm të fitonim. Futbolli ka episode, siç është rasti që barazoi Vllaznia. Në disa momente mund ta zgjidhnim më mirë, kishim punuar për thellësinë, edhe pse kundërshtarët ndryshuan krahët. Ndryshuam sistem 3 herë gjatë ndeshjes. Megjithatë, është një ndeshje që u mbyll në barazim dhe ky është rezultati i fushës.
Përmirësimi nuk ka fund, ne edhe kur dolëm me dy sulmues të deklaruar, ishte që të mos vuanim gjerësinë se kërkonin lojtarët e krahut që ishin të rrezikshëm. Ky është një sistem që e përdorim për herë të parë. Nuk është Mba në gjendjen optimale, kur e përdorim për herë të parë dhe ka pak kohë, është shumë për të përmirësuar, sidomos në zonat bosh ku duhet hapësirë. Ngjeshëm Sotën që të bëhet lojtar shtesë në mesfushë. Kërkuam krosimet për të gjetur dy sulmuesit, por thashë pas ndeshjes duke diskutuar me stafin që ndoshta mund të kalonim më shpejt në këtë sistem. Na kushtëzon gjendja e Mba që ka pak ditë stërvitje, por prezenca e tij në fushë ndjehet.
Deri te penalltia kishim të gjithë situatën në kontroll, mund të lexonim më mirë situatën, edhe pse ishte ndeshje e mirë. Na mungoi thellësia në pjesën e parë në pjesën e brendshme. Vllaznia na vuri në vështirësi në tranzicion ose me topat e gjatë. Kërkonim ta zgjidhnim sulmin shumë shpejt, duke shkuar shpejt dhe kundërshtari u riniste, duke bërë që të vinin shpejt në tranzicion negativ. Zgjatja na penalizoi dhe për këtë arsye u munduam të ndryshojmë tranzicionin, topat e gjatë të tyre duke pasur Balajn, duke kërkuar 1 kundër me Malën e Grudën. Na ndikoi të bënim metra më shumë dhe për t’u futur në panik në disa situata. Kur ke topin duhet të ruash ekuilibrin. Duhet durimi kur ke topin në zotërim, për të ndërruar krahun e lojës që të mos zgjatej skuadra.
Merkato në prapavijë? Ne kemi tre qendërmbrojtës, Salin, Sotën, Janjevën dhe Prekën që po vjen dhe kjo periudhë e merkatos ka edhe pak ditë. Nuk është ajo shpëtimtarja dhe nuk kemi kërkuar lojtarë për të plotësuar numrin. Nëse gjejmë një për të tashmen e të ardhmen sipas parametrave të kërkuar, klubi do ndërhyjë se nuk po kursehet. Por në këtë periudhë është e rëndësishme që të gjejmë lojtarë që japin siguri. Por nuk është se jam në alarm për t’i kërkuar klubit.
E pashë penalltinë, nuk është kompetencë e imja të merrem. Pas pjesës së parë jam marrë me lojtarët që ta harrojnë atë. Loja ka një gjyqtar që vendos, ne duhet të harrojmë atë që ndodh dhe të fokusohemi te loja e jonë, kurrsesi të merremi me gjyqtarin”, tha Shehi për “MCN” pas ndeshjes.
Discussion about this post