Trajneri i skuadrës së Tiranës, Orges Shehi ka analizuar suksesin e bardhebluve ndaj Partizanit teksa theksoi se nuk e shqetëson aspak loja e brishtë e lojtarëve të tij por rëndësi në të tilla ndeshje kanë vetëm tre pikët.
“Ndryshuam, pasi pamë Muratajn që i bashkohej treshes në sulm dhe nuk mund të rrezikonim, ndaj kaluam në rreshtimin 4-3-3. Na shkoi mirë dhe jam i kënaqur që ia dolëm të marrim fitoren.
Kemi kërkuar që mesfushorët të ngjiteshin më lart e t’u bashkoheshin sulmuesve, por nga rëndësia që ka derbi, është primare të marrësh masat mirë në fazën mbrojtëse. Kemi bërë disa ndryshime gjatë ndeshjes, duke ndryshuar pozicionet e lojtarëve. Do të mundohemi të rritim kualitetin, pasi në pjesën e dytë u tërhoqëm më shumë se duhet, por këto janë gjëra normale kur ka presion dhe kërkon të mos humbësh ndeshjen.
Në derbi nuk ka shumë spektakël, pasi nervat janë të tendosura dhe emocionet të shumta, ndaj jam i kënaqur me fitoren dhe për të tjerat do shohim në vijim. Duhej të luanim më shpejt topin, më shumë për Seferin, sesa për Ngo’o që ishte më i izoluar. Do ishte mirë ta kishim mbyllur ndeshjen, por nuk ia dolëm.
Unë mendoj se është ende herët të flasim për Partizanin jashtë garës për titullin. Ka 7 skuadra të mëdha dhe është shumë e rëndësishme të fitojmë ndeshjet direkte, por është herët të nxjerrim nga loja Partizanin”, deklaroi trajneri Orges Shehi.
