Banorët e Torinos në Itali janë tronditur nga një ngjarje e rëndë që ka ndodhur ditën e sotme. Një ndërtesë dykatëshe është rrënuar plotësisht dhe ka zënë poshtë një grua 34-vjeçare me origjinë nga Shqipëria së bashku me fëmijën e saj 4 vjeçar.
Nga ngjarja është ndarë nga jeta 4-vjeçari, Aroni, ndërsa e ëma ia ka dalë të shpëtojë e gjallë.
Në ndërtesë kishte 6 apartamente dhe në të strehoheshin familje me origjinë shqiptare dhe rumune. Shembja ndodhi para orës 9 të mëngjesit dhe zhurma u dëgjua deri në rrethin Madonna di Campagna, shpërthim i cili erdhi si pasojë e një rrjedhje gazi.
Rreth orës 10.30 një burrë u identifikua gjithashtu nën rrënoja dhe së fundmi është transportuar në spital, por gjendja e tij duket stabile. Dy djem të tjerë u shpëtuan jashtë ndërtesës dhe një 22-vjeçar, i cili jetonte në katin e dytë, pësoi djegie të rënda në 50% të trupit dhe është shtruar në spital. Për momentin nuk duket se ka persona të tjerë të përfshirë në kolaps.
Operacionet e kërkimit-shpëtimit përfunduan në orën 1.30 pasdite, ndërsa masat e bonifikimit dhe sigurisë vazhdojnë.
