Shëngjini përjetoi dje momente tmerri, ndërsa zjarri dogji pyje dhe prona, duke rrezikuar edhe jetën e banorëve. Por, ndërsa banorët luteshin dhe zjarrfikësit luftonin me flakët, ministrat e kabinetit të Edi Ramës postonin video me valle dhe këngë, duke tentuar të shtensiononin situatën e krijuar nga zjarri apokaliptik, që përfshiu disa ndërtesa dhe po i afrohej disa resorteve në portin e Shëngjinit.
Nëpërmjet një postimi në rrjetin social “FB”, ish-ministri i Brendshëm, Taulant Balla, i cili ndodhej në Shëngjin për të parë nga afër progresin e forcave zjarrfikëse në luftën e tyre me flakët, ka treguar se njerëzit nuk janë më edhe aq të frikësuar.
“Përtej problematikës me zjarret në kodrat përreth, kjo është atmosfera festive në këtë moment në Shëngjin”,- shkruan Balla.
Të njëjtën video e ka postuar edhe ministri i Drejtësisë, Ulsi Manja, i cili ka qenë po ashtu i pranishëm në Shëngjin së bashku me Ballën, teksa shkruan se pamjet e publikuara janë për pirromanët digjitalë që u fryejnë flakëve të panikut nga tastierat e telefonave.
“Kjo video është për pirromanët digjitalë që u fryjnë flakëve të panikut nga tastierat e telefonave. Mos i lodhni gishtat duke shkruajtur… Në Shëngjin gjithçka është nën kontroll, turistët dhe qytetarët i janë kthyer normalitetit dhe s’ka asnjë vend për panik”, shkruan ministri Ulsi Manja.
Në videot e postuara, shihen njerëz duke kënduar dhe kërcyer valle, pa e vrarë shumë mendjen për atë që po ndodhte aty, ku rrezikohej që e gjithë zona bregdetare të kthehej në shkrumb e hi.
Discussion about this post