Kosova ka barazuar në duelin e mbrëmjes së sotme, të kualifikueseve të Euro 2024, përballë Rumanisë.
Dueli i zhvilluar në stadiumin “Fadil Vokrri” të Prishtinë, u mbyll me rezultatin e bardhë, 0-0. Ky rezultat i qëndron ngushtë, djemve të Alain Giresse, të cilët për hir të së vërtetës, merituan më shumë në këtë ndeshje.
Nga fillimi i takimit e deri në fund, vendasit kishin rastet më të pastra për të shënuar, por mungesa e saktësisë përpara portës, si dhe pritjet e portierit të Rumanisë bënë që rezultati të mos ndryshonte.
Në minutën e 69′, Kosova u duk se zhbllokoi rezultatin por, sistemi VAR e anuloi golin e Zhegrovës, për shkak të një pozicioni jashtë loje të Celinës.
Duhet thënë se dhe ekipi mik, krijoi rastet e tij për gol, duke shfrytëzuar kryesisht, daljet në kundërsulm, por mbrojtja kosovare, nuk u zu në befasi.
Në fund, një barazim që nuk lumturon askënd, me Kosovën që duhet të presë ende për të regjistruar fitoren e parë në këtë fushatë eliminatore, në një grup që, në letër, e ka mëse të përballueshëm.
Discussion about this post