Dy aksidente me pasoja tragjike kanë ndodhur mëngjesin e së martës në Shkodër e Lezhë. Aksidenti i parë ndodhi rreth orës 06:00 të mëngjesit në aksin rrugor Lezhë-Shkodër, konkretisht në afërsi të kryqëzimit të Dajçit.
Sipas policisë, automjeti me drejtues shtetasin Zyhdi Metin është përplasur me automjetin me drejtues Vilson Tola. Nga aksidenti gjeti vdekjen e menjëhershme Zyhdi Meti. Ndërsa, drejtuesi i automjetit tjetër Vilson Tola ka marrë dëmtime serioze dhe është dërguar në spitalin e Traumës në Tiranë për mjekim më të specializuar. Shkak i aksidentit fatal mendohet se është parakalimi i gabuar i mjetit me drejtues shtetasin Vilson Tola, duke sjellë edhe përplasjen e fortë. Si pasojë e aksidentit, për një periudhë të gjatë kohore është bllokuar edhe ky aks rrugor, duke shkaktuar trafik të automjeteve. Edhe pse në një hark kohor të shkurtër, në këtë superstradë janë shkaktuar 3 aksidente me pasojë vdekjen e personave, deri më tani akoma nuk është marrë asnjë masë nga ana e policisë apo edhe autoritetit rrugor.
Pak orë pas aksidentit të parë, një tjetër përplasje ndodhi në aksin rrugor Shkodër-Koplik, në vendin e quajtur Gruemirë Çezme. Burime nga policia për Gijotina.com bëjnë me dije se një 54-vjeçar i identifikuar me emrin Nikoll Gega, duke udhëtuar me shpejtësi përtej normave, ka përplasur me mjetin tip “Mercedes Vito”, një biçikletë që drejtohej nga 61-vjeçari Isa Hasmuja. Ky i fundit si pasojë e përplasjes së fortë ka marrë plagë të rënda dhe ka ndërruar jetë. Shoferi përgjegjës për këtë aksident tragjik është shoqëruar në Komisariat për veprime të mëtejshme, ku pritet të zbardhen detaje të reja të ngjarjes, pas marrjes në pyetje të tij. A.L. /Gijotina.com
