Fushë-Krujë, nxënësi goditet me thikë nga bashkëmoshatari brenda oborrit të shkollës

Një plagosje me thikë e një nxënësi është shënuar në oborrin e gjimnazit “Shote Galica” në Fushë Krujë.

Sipas hetimeve paraprake, Klisman D., 18 vjeç u godit me thikë nga një bashkëmoshatar i tij. Nuk dihen ende rrethanat dhe shkaqet, ndërkohë i plagosuri është dërguar me urgjence në spitalin e Traumës në Tiranë.

Policia e Tiranës konfirmoi ngjarjes pas raportimit të sajk fillimisht nga mediat. “Rreth orës 10:45, në gjimnazin ‘Shote Galica’ në Fushë Krujë, një 17-vjeçar është konfliktuar me shtetasin K.D., 18 vjeç (të dy nxënës shkolle).  Gjatë konfliktit, 17-vjeçari dyshohet se ka goditur me mjet prerës shtetasin K.D., i cili si pasojë është dëmtuar dhe ndodhet në spital, në kujdesin e mjekëve. Autori i dyshuar është shoqëruar në komisariat për veprime të mëtejshme ndërsa grupi hetimor po vijon punën për sqarimin e rrethanave të ngjarjes”, thuhet në njoftimin e bluve, pa dhënë të tjera detaje rreth rastit.

Që prej nisjes së vitit shkollor, Policia ka shpërndara në disa raste njoftime se kishte rritur prezencën në institucionet arsimore me qëllim shtimin e sigurisë. Pavarësisht kësaj, krimet kundra jetës, si rasti i kësaj të mërkure në Fushë-Krujë, vijojnë të ndodhin.