Nëntë nga dhjetë policët e arrestuar nga operacioni i SPAK që u zhvillua disa ditë më parë janë liruar.
Gjykata e Tiranës dhe Korçës kanë vendosur masat e sigurisë për 10 policët e arrestuar në këto dy qarqe, pasi akuzohen për shpërdorim detyre.
Në “arrest shtëpie” janë lënë Jashar Shehu dhe Arjan Balla. Sakaq, gjykata ka caktuar “pezullim nga detyra” dhe detyrim për t’u paraqitur në policinë gjyqësore për Matilda Hamollari, Petro Fraholli, Klemend Pikuli, Genci Hysi, Çlirim Akrobati, Kamber Kllogjeri. Krenar Gjokutaj “detyrim për t’u paraqitur”.
Efektivët u arrestuan pasi dolën në përgjime duke bërë pazare për mbylljen e lokaleve dhe tolerimin e qytetarëve që kryenin shkelje.
Konkretisht, këta punonjës policie, me veprimet dhe mosveprimet e tyre, në kohë dhe episode të ndryshme, në disa raste në bashkëpunim me njëri-tjetrin, kanë shfrytëzuar aksesin në sistemet dhe regjistrat e Policisë së Shtetit për sigurimin e të dhënave personale të shtetasve pa autorizim. Gjithashtu, ata dyshohet se kanë lejuar dhe favorizuar persona të ndryshëm, në disa raste duke raportuar të dhëna të pavërteta, për mosndëshkimin e tyre me masat administrative përkatëse sipas Kodit Rrugor dhe Aktit Normativ për masat anticovid.
