Nisur nga vala e re e infektimeve ditët e fundit, dhe si pasojë e fluksit në rritje të pacientëve që kërkojnë trajtim të specializuar, Ministria e Shëndetësisë ka aktivizuar planin për përballimin e situatës duke hapur sot spitalin Covid3.
Përmes një postimi në Facebook, ministrja Ogerta Manastirliu, ndërsa motivon punonjësit e stafit mjekësor, nuk harron të përsërisë thirrjen për vaksinim.
“Forca ekipit të Spitalit Covid3 në shërbim në këto momente, i hapur për të përballuar shtimin e rasteve të qytetarëve të prekur nga Covid që kanë nevojë për trajtim spitalor.
Kemi riaktivizuar planin e përballimit të situatës, për t’iu përgjigjur fluksit në spitale, me përforcimin e ekipeve mjekësore, sigurimin e barnave dhe materialeve mjekësore dhe aparaturat jetëshpëtuese, por është thelbësor vaksinimi masiv, për të frenuar përhapjen e epidemisë në vend dhe lehtësuar pasojat e saj“, shkruan Manastirliu.
Fillimisht është hapur pavioni i parë prej 40 shtretërish, ndërsa në total kapacitet e këtij spitali janë 150 shtretër.
Ministria e Shëndetësisë do të vendosë në dispozicion dhe spitalin Covid 4, në rast nevoje si dhe do të aktivizohet skenari i spitaleve rajonale.
