Autoritetet në Ekuador kanë arrestuar ish-drejtuesen e lartë të Policisë, Tannya Varela, e dyshuar se ka shpërndarë informacione sekrete tek grupe kriminale të lidhura me mafian shqiptare.
Operacioni u krye nga Zyra e Prokurorit të Përgjithshëm këtë të enjte, më 18 dhjetor, në veri të Quito-s. Gjatë arrestimit, policia i sekuestroi telefonin celular dhe kompjuterin personal, të cilat do të përdoren si prova në hetim.
Sipas Prokurorisë, hetimi ka nisur në vitin 2023 dhe lidhet me rrjedhjen e një raporti konfidencial të vitit 2021, pjesë e një hetimi për trafik droge me emrin “Luani i Trojës”. Mediat e huaja raportojnë se ky raport përmbante informacione për lidhje të dyshuara mes zyrtarëve dhe mafies shqiptare, si dhe përfshirjen e disa personave të afërt me pushtetin.
Prokuroria thotë se dokumenti sekret është shpërndarë dy herë, në vitet 2021 dhe 2023, çka ka ngritur dyshime të forta për rrjedhje informacioni nga nivelet e larta të policisë.
Emri i Tannya Varelës ishte përmendur edhe më herët në një raport të Frontit Parlamentar Kundër Korrupsionit, ku flitej për shtrirjen e mafies shqiptare në Ekuador. Në atë raport, ajo përmendej me pseudonimin “Numra”. Në shkurt të vitit 2024, Varela i mohoi publikisht këto akuza, duke thënë se ato janë të pavërteta.
Discussion about this post