Shqiptarët po përballen këtë shtator me rritjen e çmimit të bukës deri në 30 lekë në disa qytete.
Prej 2 javësh disa furra në vend kanë rritur çmimin e bukës me 10 lekë, duke e çuar në 80 lekë, me një shtrenjtim rreth 14%.
Anëtarë të Shoqatës të Prodhuesve të Bukës, Patiçerive dhe Brumrave thonë se së shpejti rritja e çmimit të bukës me 10 lekë do të ndodhë në të gjithë tregun. Arsyeja kryesore e rritjes të çmimit të bukës është rritja e çmimit të miellit në tregun vendas me 5 lekë/kg që në fillim të muajit gusht.
Në lidhje me rritjen e çmimit të bukës, kanë reaguar edhe pronarët e furrave të bukës, të cilët shprehen se, nëse çmimi i miellit dhe gjithçka tjetër që përdoret për prodhimin e bukës pëson rritje, atëherë edhe ne do detyrohemi të ngremë çmimet e bukës.
Pronarët e furrave të bukës shprehen se, ata janë mbledhur disa herë si prodhues buke për të diskutuar në lidhje me rritjen e çmimit, por ende nuk kanë rënë dakord nëse do të rritet me 10 apo 20 lekë (të reja), gjë që-sipas tyre-do të varet nga rritja e çmimit të miellit.
“Nuk është mirë që të rritet çmimi se njerëzit janë shumë të varfër, megjithatë përderisa nuk ka prodhim mbase dhe ata të mëdhenjtë janë të detyruar që ta rrisin. Nëse rritet çmimi i miellit edhe ne jemi të detyruar që ta rrisim çmimin e bukës, por deri tani nuk e kemi rritur çmimin. Buka do të rritet me 10-20 lekë. Unë e nis dyqanin me minus.”- thotë shitësja.
Vetë konsumatorët shprehen se, ata nuk e përballojnë dot rritjen e çmimit të bukës pasi të ardhurat e tyre janë tepër të ulëta dhe mezi sigurojnë jetesën.
“Ne jemi pensionistë. Nuk e përballojmë dot sepse jemi shumë të sëmurë. Nuk kemi nga ti gjejmë të ardhurat dhe pensioni ka dy vite që nuk na rritet.”- shprehen qytetarët.
Me gjithë pretendimet e pronarëve të furrave të bukës dhe shqetësimet e ankesat e qytetarëve, përsëri, çmimi i bukës pritet të rritet nga dita në ditë edhe në Berat, ku çmimi i miellit dhe produkteve të tjera për prodhimin e bukës janë rritur.
