Me qindra kuintal me shalqi janë kalbur në orë në zonën e Kozares në qytetin e Kuçovës, pasi fermerët nuk arritën ta shisnin dot prodhimin për shkak të mungesës së tregut.
Besim Shkurti, tregon gjatë një interviste televizive se ai vetë mbolli këtë vit 7 ha me shalqi, duke shpenzuar në të rreth 40 milion lekë por edhe pse prodhimi ishte i bollshëm e me cilësi, ai nuk arriti dot të shesë asgjë, duke humbur miliona lekë. Sipas Shkurtit, shalqiri nuk gjeti treg shitjeje pasi u bllokua eksporti. Ai deklaron se i gjithë shalqiri në arë i është kalbur dhe nuk di në çfarë institucioni të gjejë zgjidhje për të verifikuar prodhimin e kalbur që ndodhet ende në tokë dhe për të marrë një dëmshpërblim.
“600 ton shalqi i kalbur. Kam hedhur 40 milion lekë për prodhimin, plus kredi dhe falimentova. Ku të plasëm? Mallin e eksportoja jashtë shtetit, vinin këtu me makina dhe e merrnin. Sivjet shalqiri nuk u shit pasi u bllokua eksporti, nuk kam dot shitur asnjë makinë shalqi. Janë 600 ton shalqi në 7 ha tokë që mu kalbën dhe për këtë prodhim kam hedhur 40 milion lekë,25 milion i kam marrë kredi, pa llogaritur punën dhe mundin tonë sepse në këto ara unë janë punësuar 4 anëtarë të familjes sime”, shprehet ai.
Në emër edhe të fermerëve të tjerë ai i bën thirrje qeveris që t’i dëmshpërblejë sepse familjet në këtë fashat mbahen dhe kanë si të ardhurave të vetme fitimet që nxjerrin nga bujqësia, por që këtë vit rezultoi kaotike.
