Europol njoftoi sot se janë arrestuar 37 anëtarë të një grupi kriminal shumë të dhunshëm nga Ballkani Perëndimor, i cili merrej kryesisht me kontrabandën e drogës dhe armëve të zjarrit në të gjithë Evropën.
Sipas raportimeve, nga 37 të dyshuar, 15 janë arrestuar në bastisjet e djeshme, të cilat u kryen njëkohësisht në të gjithë Kroacinë, Slloveninë, Bosnje-Hercegovinën, Holandën, Italinë, Belgjikën dhe Gjermaninë.
Veprimet janë koordinuar nga posta komanduese në Zagreb, me mbështetjen e oficerëve të Europolit të dislokuar në terren.
Grupi drejtohej nga një shtetas i Bosnjë-Hercegovinës, i cili aktualisht po vuan dënimin me katër vite burg në Itali.
Ai vazhdoi të organizonte veprimtari kriminale nga qelia e tij e burgut, nga ku besohet se jepte rregullisht urdhra dhe udhëzime për vartësit e tij.
Gjatë bastisjeve, ndër të tjera u sekuestruan 148 mijë euro para të gatshme, 18 armë zjarri, mes tyre dy automatikë dhe 2512 copë municione.
Gjithashtu, janë sekuestruar 15 kilogramë kokainë, 11 kilogramë heroinë, tre kilogramë amfetaminë, shtatë kilogramë marijuanë dhe 10 kilogramë hashash.
Ky aksion ndërkombëtar pasohet nga një hetim kompleks i udhëhequr nga Administrata Kryesore e Policisë Kroate, në kuadër të Grupit Operativ “Karteli Ballkanik”, thuhet në njoftimin e Europol.
Europol ka krijuar më parë Grupin Operativ të Punës “Balkan Cartel”, i cili mbledh së bashku hetues nga e gjithë Evropa dhe bota, për të trajtuar në mënyrë efektive kërcënimet që vijnë nga ky rajon. Në kuadër të punës së këtij grupi, së fundmi në Serbi u shpërbë organizata më e madhe e trafikut të drogës në Ballkan.
Discussion about this post