Pas shkeljes së armëpushimit mes Iranit dhe Izraelit, presidenti amerikan Donald Trump paralajmëroi Tel-Avivin të ndalë menjëherë sulmet për t’i lënë hapësirë rrugës diplomatike.
Sipas Trumpit, “hakmarrja” e Izraelit ndaj sulmeve iraniane të pretenduara në orët e fundit, edhe pse Teherani i ka hedhur poshtë akuzat për lëshimin e raketave në drejtim të Izraelit, do të ishte një shkelje e madhe. Për këtë arsye, Trump i kërkoi Izraelit që të kthejë në shtëpi pilotët e vet.
“Izrael, mos i lësho bombat. Nëse e bën është shkelje e madhe. Ktheji pilotët në shtëpi, tani!” shkroi Trump në rrjetin e tij social, Truth Social.
Gjithashtu presidenti i SHBA-së foli për mediet para se të nisej për samitin e NATO-s në Hagë.
“Pati një raketë që mendoj se u hodh jashtë detit dhe tani Izraeli po largohet. Irani dhe Izraeli duhet të qetësohen”, tha ai, duke folur me gazetarët.
Ai shtoi se nuk i kanë pëlqyer “shumë gjëra” që pa dje, si nga Izraeli, ashtu edhe nga Irani.
“Në thelb kemi dy vende që luftojnë prej një kohe aq të gjatë dhe aq fort sa nuk e dinë se çfarë po bëjnë”, tha më tej Trump.
Pas deklaratës së tij, mediet raportuan se kreu i Shtëpisë së Bardhë dhe Benjamin Netanyahu zhvilluan një bisedë telefonike, ku mësohet se kryeministri izraelit e kishte njoftuar për një “goditje simbolike” në reagim ndaj lëshimit të dy raketave balistike të pretenduara si iraniane. Goditja u krye nga Forcat Ajrore Izraelite ndaj një radari iranian në veri të Teheranit, siç konfirmuan zyrtarët e Tel-Avivit.
Ky paralajmërim i presidentit Trump vjen pas një armëpushimi të rënë dakord midis Iranit dhe Izraelit, i cili hyri në fuqi herët këtë mëngjes, por që Izraeli pretendoi se armëpushimi u shkel nga Irani. Marrëveshja u ndërmjetësua nga SHBA-të dhe Katari, për të cilën Trump ka kërkuar edhe një herë që palët të respektojnë armëpushimin dhe të ndalin çdo sulm.
Discussion about this post