Banorët e Lazaratit vazhdojnë të shkojnë te burimi me shpresën se do të sigurojnë ujë të pijshëm për 24 orë, por asgjë. Situata bëhet më e vështirë për ta në këtë sezon të nxehtë vere ku temperaturat sa vijnë e ngrihen. Megjithatë ashtu siç e kanë bërë të udhës kryetarët e Bashkive vazhdojnë “të lënë në meshirë të fatit” problemet dhe kërkesat bazë të qytetarëve për të jetuar.
Në vitin 2020 kryetari i Bashkisë së Gjirokastrës Flamur Golemi ka premtuar se brenda 12 muajsh në Lazarat do të ketë ujë 24 orë.
“Çdo banor i fshatit, çdo familje do të ketë ujë 24 orë , ujë të standardeve të BE.”
Por kur kanë kaluar dy vite nga nisja e projektit me vlerë 268 milionë lekë, situata është edhe më problematike. 3500 banoret e zonës prej 10 ditësh nuk kanë ujë.
“Vjet e bënë, vajti një vit, nuk kemi pikë uji. Paratë i kanë marrë, janë paguar.”
Më parë furnizohesh në rreth 30 minuta, por tashmë çezmat janë tharë. Të vetmen shpresë kanë burimin në qendër të fshatit dhe lumin ku shkojnë e mbushin me mjete cisternat.
“Kush e di se sa miliona lekë janë shpenzuar dhe Lazarati nuk ka ujë.”
Megjithatë nga projekti kanë mundur të shohin investimet e para atë të instalimit të sahatëve, të cilët duket se edhe për disa kohë do të jenë vetëm dekorativ.
Discussion about this post