Konstitucionalisti Shkëlqim Hajdari ka folur mbi vrasjen e efektivit të Policisë në Lezhë. Gjatën një interviste televizive ai tha se, kjo është një ngjarje e rëndë dhe se janë shtuar shumë rastet kur policët vriten në krye të detyrës nga grupe kriminale.
Sakaq, ai bërin thirrje të gjithë institucioneve përgjegjëse që kjo ngjarje të analizohet mirë dhe të bëhet si mësimi për operacionet në vazhdim.
“Është një ngjarje e rëndë. Ndër vite kemi parë ngjarje, ku policë kanë humbur jetën në krye të detyrës, ky është një i tillë. Është një ngjarje që nuk duhet të kalohet më rutinë, por duhet të shërbejë për gjithë Policinë e Shtetit, që të analizojë gjithë veprimtarinë e saj, që punonjësit të përmbushin detyrën, dhe nga ana tjetër, që të jenë të trajnuar. Përplasja me grupet kriminale sot është shumë e vështirë.
Policia duhet të jetë shumë e kujdesshme, që të plotësojë detyrën, por të ruajë edhe jetën, kur shkojnë në operacione. Ngjarja e sotme duhet të analizohet. Ato kanë pasur informacione për kanabisin, por nuk kanë pasur informacione se aty ka pasur persona kaq të rrezikshëm, ndaj dhe ndodhi ajo që ndodhi. Ai është qëlluar pa paralajmërim dhe për fat të keq të policit, plumbi e ka marrë në organ jetësor. Ato që ndodhën më tej, asgjësimi i parcelës, nuk ka shumë rëndësi”, u shpreh ai.
Këtu ai i bëri thirrje qeverisë që të mos eci më në këto hapa për luftën kundër krimit dhe luftimin e narkotikëve në vend. Sipas Hajdarit ka ardhur koha që të vihet në zbatim një operacion më i mirë menduar dhe në përmasa më të mëdha.
“Gjaku i këtij punonjësi policie, që duket që kishte vite që punonte dhe shumë korrekt e i përkushtuar, duhet të shërbejë shumë për shtetin shqiptar, që të kemi një plan të madh operacional për gjithë kanabisin në Shqipëri. Nëse do të ngrihen të gjitha policitë e qarqeve, në të njëjtën kohë, në të njëjtin moment, edhe krimi e ka shumë të vështirë t’i kthehet me armë policisë”, tha ai.
Hajdari tregoi se, ngjarja do të shoqërohet me një hetim penal, kështu që SHÇBA duhet të bëjë hetimet e veta edhe në lidhje me efektivët që ishin pjesë e operacionit. Sipas tij, prokuroria do të hetojë dhe do të shihet se si kanë vepruar dy kolegët e tij.
