Prej më shumë se dy muajsh familja Kërkapi në fshatin Mollas të Cërrikut ndodhet në qiell të hapur. Shkak është bërë një shkëndijë elektrike, e cila i shkrumboi banesën e moçme dhe çdo gjë që ndodhej brenda saj, përfshirë dhe paratë e fituara në emigracion nga djali i shtëpisë Armandi.
Ky i fundit thotë se pas rikthimit nga emigrimi kishte menduar të rikonstruktonte shtëpinë por nuk mundi. Plotësisht i pafuqishëm kërkon ndihmë pasi dy fëmijët dhe prindërit e moshuar sot janë pa një çati mbi kokë.
“Nga instalimet e vjetra. Edhe ato lekë që punova në Greqi. Plaku ka qenë jashtë, plaka te dhoma këtu, s’ka qenë në terezi. Kemi bërë kërkesë të bashkia, nuk na kanë ndihmuar fare. Plaku s’merr asnjë lloj pensioni. Edhe plaka sëmurë. Vetë pa punë. Edhe gruaja pa punë”.
Më tej e vështirë është situata për të moshuarin i cili gjendet në karrige me rrota. Burrë e grua luten për ndihmë nga pushteti lokal.
“Mu morën mendt nga tensioni dhe rashë të krevati. Është djegur edhe njëherë. Hera e dytë që digjet. Kërkoj ndihmë. Çuni, nusja pa punë”.
E vetmja ndihmë që familja prej 6 anëtarësh ka përfituar është një çadër nga njësia vendore. Por familjarët thonë se i druhen ardhjes së stinës së reshjeve.
Discussion about this post