Situata është tensionuar në Shkodër, ku protesta e studentëve ka kaluar në përplasje dhe akte dhune ndaj godinës së Bashkisë.
Protestuesit kanë qëlluar me gurë dhe kapsolla drejt institucionit, duke thyer disa xhama, ndërsa në muret e Bashkisë kanë shkruar me bojë.
Gjatë incidenteve raportohet se një vajzë ka mbetur e plagosur nga gurët. Deri tani nuk ka të dhëna të tjera për gjendjen e saj shëndetësore apo rrethanat e sakta të plagosjes.
Ndërkohë, forcat e policisë nuk kanë ndërhyrë për shpërndarjen e protestuesve, por po monitorojnë zhvillimet nga ajri përmes dronëve.
Ngjarjet në Shkodër vijnë në ditën e tretë të protestave të studentëve dhe gjimnazistëve kundër qeverisë, të cilat kanë përfshirë edhe Tiranën.
Në kryeqytet, protesta e sotme është shoqëruar me përplasje të forta përpara Ministrisë së Arsimit dhe Parlamentit, ku policia ka përdorur gaz lotsjellës për të shpërndarë turmat e të rinjve.
Ndryshe nga Tirana, ku forcat e rendit kanë ndërhyrë disa herë gjatë paradites, në Shkodër policia ka zgjedhur deri tani të monitorojë protestën, pavarësisht dëmtimeve të shkaktuara në godinën e Bashkisë.
Discussion about this post