Kryebashkiaku i Divjakës, Josif Gorrea harxhon lekët për të ndërtuar një palestër në shkollën me mure të plasaritura dhe nxënësit nuk kanë ngrohje. Në muajt e fundit, Gijotina.com ka publikuar disa procedura abuzive të bashkive që po shfrytëzojnë projektet për shkollat duke përfituar nga fondet dhe duke lënë nxënësit pa mësim, sepse vetëm në Shqipëri ndodh që punimet të fillojnë në mes të dimrit.
Këtë radhë e kemi fjalën për abuzimin me fondet e shkollës në Remas të Divjakës. Më datë 7 dhjetor 2023, Gorrea ka firmosur tenderin me objekt “Rikonstruksion i objekteve ekzistuese, shtesë anësore dhe ndërtim palestre në shkollën e mesme të bashkuar Remas”.
Bëhet fjalë për shkollën që ndodhet në foto më poshtë.
Është një shkollë e vogël ku nga klasa e parë deri në klasën e 12 mësohet në të njëjtën godinë. Nuk ka ngrohje, ka akoma pllaka të vjetra, mure të plasaritur. Por, kryetari Gorrea nuk i sheh këto, por bën një shpenzim të çmendur prej 920 milionë lekësh ku pjesa e luanit shkon për të ndërtuar një palestër.
Sigurisht fondi në raport me punën që do të bëhet është një përfitim i lartë për kompaninë që e merr përsipër. Prandaj, për këtë tender kanë aplikuar 18 firma me oferta të niveleve të ndryshme. Por, sikur ndodh rëndom, Gorrea ka shkuar tek oferta më e shtrenjtë. Ai ka vepruar ashtu si edhe kolegët e tij: 17 firma i ka skualifikuar që në fazën e parë, edhe pse 7 prej tyre kishin propozim shumë më të lirë se fituesi dhe më ekonomike se fondi limit i vendosur në dispozicion.
Epo shmangia e konkurrencës është skema që përdor Gorrea për t’ia dhuruar këtë tender firmës “2N” me pronar Namik Shahinin – 100%. Një emër i dëgjuar ky për projekte të tilla, ku në fund puna bëhet me cilësi të dobët.
Për këto shkelje që renditëm, prokurimi është vlerësuar me “Flamur të kuq” nga Open Data, duke treguar riskun e korrupsionit.
Por, historia me këtë tender qëndron më thellë. Kjo aferë ka qenë e porositur nga ish-kryetari i bashkisë Fredi Kokoneshi. Ky i fundit ka qenë kryebashkiak deri në muajt e parë të këtij viti, por në zgjedhjet e 14 majit, PS nuk e prezantoi më si kandidat.
Rilindja e shmangu këtë figurë për shkak të akuzave se Kokoneshit ishte marrë me trafik prostitucioni në Itali, e më pas u pasurua me përvetësime nga tenderët e parregullt. Çuditërisht Gorrea po çon deri në fund porosinë e kolegut paraardhës.
Në këtë pikë prindërit kanë një pyetje, përderisa plani qenka bërë që në fillim të vitit, pse nuk u zhvillua tenderi përpara sezonit veror?
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post