Shkon në 44 numri i viktimave të tragjedisë në Greqi

Numri i të vdekurve nga tragjedia në Tempi ka shkuar tashmë në 44. Lajmin e dha Roubini Leontari, kreu i Shërbimit Ligjor të Larisës. Ai theksoi se ekspertiza mjeko-ligjore ka përfunduar në 44 trupa, shumica e të cilëve ishin të rinj (20-30 vjeç) dhe në gjendje shumë të keqe.

Nga të dhënat e zjarrfikësve rezulton se janë 19 persona të zhdukur. Janë ata që nuk përfshihen në 44 të vdekurit, 72 të plagosurit dhe 222 që nuk kanë pasur nevojë për trajtim në dy trena me gjithsej 356 pasagjerë.

Ngjarja e rëndë ndodhi një natë më parë pranë Larisës në Greqi. Treni me 350 udhëtarë që ishte nisur nga Athina për në Selanik është përplasur me një tjetër që po transportonte mallra duke shkaktuar një bilanc tragjik me të paktën 44 të vdekur dhe mbi 85 të plagosur.

150 zjarrfikëse ndodhen në vendin e ngjarjes. Kërkimet vijojnë dhe bilanci fatkeqësisht pritet që të rëndohet.