Ditën e djeshme Këshilli Kombëtar i Partisë Demokratike zgjodhi 20 anëtarët e Kryesisë ndërkohë Komisioni i Rithemelimit ka pushuar së funksionuari.
Ky Komision u ngrit nga Kuvendi i 11 dhjetorit, i mbajtur në Air Albania, ku u vendos shkarkimi i Lulzim Bashës si kryetar i PD, si dhe forumeve drejtuese të kësaj partie, si edhe Sekretariatin.
Për drejtimin e Partisë Demokratike u vendos ngritja e një Komisioni i cili u pagëzua me emrin “Rithemelim”, ndërsa pjesë e tij ishin 29 anëtarë. Nga momenti i miratimit, ky Komision mori vendimet në emër të PD-së, përfshirë këtu edhe thirrjen e Kuvendit të 30 prillit, apo organizimin e atyre që u konsideruan primare për zgjedhjen e 6 kandidatëve për Bashkitë ku me 6 mars u mbajtën zgjedhjet e pjesshme vendore.
Ishte po Komisioni i Rithemelimit që i paraqiti Këshillit Kombëtar listën me 47 emrat e kandidatëve për 20 vendet e kryesisë së kësaj partie.
Në procesin e votimit kanë marrë pjesë 227 anëtarë të Këshillit Kombëtar, ndërsa mungonin rreth 30 deputetë që janë pozicionuar si mbështetës të Enkelejd Alibeajt, ose si një grupim asnjëanës.
Edhe pse ishin anëtarë të rithemelimit emrat si Genc Pollo, Edmond Spaho, Tritan Shehu, Çlirim Gjata, nuk rezultuan fitues, teksa edhe i rikthyeri në PD Arben Imami nuk u bë pjesë e kryesisë.
Dy nënkryetarët e PD dhe sekretari përgjithshëm e sekretariatet do të zgjidhen në vijim nga Këshilli Kombëtar, ndërkohë që kryetari i PD Sali Berisha, Edi Paloka, kryetari i Këshillit Kombëtar si dhe drejtuesit e Forumit Rinor dhe Lidhjes Demokratike të gruas sipas statutit janë automatikisht pjesë e kryesisë.
Discussion about this post