Sekretari i Shoqatës së Prodhuesve, Arben Shkodra, paralajmëroi sot se pas rritjes së çmimit të energjisë do të rritet edhe çmimi i ujit të ambalazhuar. Sipas tij kjo vjen zinxhir për shkak se ambalazhimi i ujit bëhet me energji elektrike.
Sipas tij ne si vend prodhues nuk duhet të ishim në krizë, pro qeveria nuk ka menaxhuar sikur duhet situatën.
“Në këto 30 vite nuk arritëm dot një politikë industriale. Sot nuk kemi një strategji për industrializimin e vendit. Serbia e di shumë mirë që nuk prodhon domate sa ne. Një industri e madhe e ambalazhimit të ujit në Francë krijon ekonomi shkalle duke investuar dhe duke pasur një çmim të ulët, Ne nuk arrijmë dot të kemi ekonomi shkalle.
Jemi vendi i dytë ose i tretë në Europë për ujëmbajtje dhe menaxhojmë 20-30% të atij uji. Ne investojmë sepse themi hajde se do ia dalim. Ne nuk prodhojmë. ¾ e kemi import. Dalin politikanë dhe flasin pse do rritet çmimi i ujit të ambalazhuar. Sepse ai ujë ambalazhohet me energji elektrike të ujit. Ti ujin nuk e merr në xhep e merr me shishe plastike”, deklaroi Shkodra.
Ai theksoi se duhet reflektim, pasi edhe vetë bizneset prodhuese në vend dëmtohen në rast të rritjes së çmimit, sepse produktet e importuara nga jashtë vijnë me kosto më të ulët për shkak të subvencioneve.
“Mendohet që ne duhet të reflektojmë ndaj çdo lloj ndryshimi që shkon në dëm të qytetarit. Nëse unë rris çmimet kuturu unë humbas tregun sepse një vend tjetër e sjell me çmime më të ulëta përmes subvencionimeve. Pse qumështi i Serbisë vjen më lirë se qumështi i prodhuar në Shqipëri. Sepse e subvencionon ai zotëria. Ne bazohemi te industrialistët që kanë para dhe marrin në bankë para”, tha ai.
Ndër të tjera ai tha se, ne jemi vend i vogël dhe nuk e krijojmë dot ekonominë e shkallës.
