Gjergj Smaka, administrator kombëtar i shoqatës së të verbërve ka deklaruar sot se kjo kategori është lënë pas dore nga qeveria. Përmes një interviste televizive ai tha se, nuk ka kushte të përshtatshme për lëvizjen e tyre në rrugë. Ndërsa shtoi këtu se nuk ka programe që mund t’i implementojë të verbrit në punë apo t’u jepen kushte për arsimim.
“Problemet më të theksuara janë ato që janë ndër vite dhe është aksesueshmëria në informacion dhe lëvizje. Duke pasur parasysh bashkitë e mëdha si ajo e Tiranës që nuk ofron asnjë kusht për lëvizjen e të verbërve mos të flasim më për bashkitë e tjera. Kjo bën që të verbrit duhet të jenë gjithmonë të shoqëruar. Të tjerat janë: Punësimi, arsimi, integrimi në shoqëri, lufta për të përballuar barriera dhe pengesa që ngrihen dashje apo padashje.
Aksesi në lëvizje është problematika kryesore që një i verbër të lëvizë i vetëm në qytet, prandaj duhen të jenë të shoqëruar nga një person i tjetër. Në asnjë trotuar në qytet nuk ka një rrugë që të jetë posaçërisht për këta persona dhe kjo krijon probleme për të pasur ata një jetë të qetë dhe sociale gjatë aktivitete të tyre të përditshme duke i bërë të varur nga një tjetër person”, tha ai.
Ndër të tjera, ai tregoi si një problem mjaft të madh për të cilin zvarriten ndër vite, pagesat e prapambetura. Smaka tha se, që nga viti 2009 nuk ka pasur asnjë rritje të kësaj pagese, pavarësisht se jemi ndeshur me situata të vështira si rritja e çmimeve të shportës.
“Pagesa e prapambetur, janë pagesa të cilat janë llogaritur gabim dhe nuk janë dhënë në kohë. Qeveria tha se do ja jepte por ata që i kanë marrë deri tani i kanë marrë përmes rrugës gjyqësore. Pengesë tjetër është se dhe vendimet e gjykatës kanë ardhur shumë vonë për tu vënë në zbatim. Problem për pagesat të aftësisë së kufizuar që është e pavarur nga të ardhurat e tjera është se nga 2009 nuk ka pasur asnjë vit rritje të kësaj pagese. Sidomos në këto kohë veçanërisht që po vërehet një rritje e çmimeve kjo pagesë nuk po rritet asnjë çast. Duke pasur parasysh dhe periudhën covid dhe postcovid, të verbrit nuk kanë pasur asnjë paketë ndihme”, u shpreh ai.
Prandaj, ai i bëri thirrje qeverisë që të reagojë dhe t’iu jap atyre atë çka iu takon.
