Kombëtarja shqiptare e futbollit do jetë në vazon e tretë gjatë hedhjes së shortit për kualifikueset e Kupës së Botës 2026, në zonën e Europës. Kuqezinjtë do mësojnë rivalët më 13 dhjetor në Zyrih të Zvicrës, teksa nuk përjashtohet një përballje me Serbinë (vazo e dytë), ose Kosovën (vazo 4).
Të gjitha projeksionet janë në bazë të renditjes së fundit nga FIFA, ndërsa të pakta janë gjasat që Shqipëria të ngjitet në vazon e dytë apo të bjerë në të katërtën.
Nëse shohim vazon e parë, një nga rivalët e Shqipërisë do jetë “peshë e rëndë”, ku janë emra si Franca, Anglia, Spanja, Italia, Holanda, Portugalia, Gjermania apo edhe Kroacia.
Në vazon e dytë gjendet Serbia dhe tanët mund të “peshkojnë” ballkanasait, me ndeshjen që do jetë më shumë se e tillë. Ndërkohë, nëse shmang Serbinë, Shqipëria mund të përballet në grup edhe me Kosovën e cila gjendet në vazon katër.
Risitë
Kupa e Botës 2026 do të ketë 104 ndeshje, duke përfshirë një fazë të re të raundit të 32-të, duke e bërë atë kampionatin më të gjatë në historinë e turneut. Turneu, i cili do të zhvillohet në Shtetet e Bashkuara të Amerikës, Kanada dhe Meksikë do të jetë i pari në histori që do të përfshijë 48 kombëtare.
Të kualifikuarit do të ndahen në 12 grupe të përbëra nga katër skuadra dhe jo në 16 grupe me nga tre skuadra siç ishte propozuar fillimisht. Fituesit e grupeve dhe kombëtaret që përfundojnë në vendin e dytë do të kualifikohen në raundin e 1/32 si zakonisht, së bashku me tetë kombëtaret me bilancin më të mirë të rezultateve që zënë vendin e tretë.
Me 40 ndeshje më shumë që do të luhen, ky turne do të zgjatet, që nënkupton se do të zhvillohet për 38 ditë (11 qershori deri më 19 korrik 2026), në krahasim me 30 ditë që kishte Katar 2022 dhe 32 ditë që kishte Kupa e Botës Rusi 2018.
Lojtarët do të kenë dy javë për t’u përgatitur për Kupën e Botës pasi që largohen nga klubet e tyre, dyfish më shumë kohë se sa që kishin lojtarët për Botërorin në Katar.
FIFA ka qenë duke e konsideruar për t’i bërë grupet me nga tre skuadra, por kjo gjë nënkuptonte se një kombëtare do të kishte mbetur e vetmuar, gjë e cila do të kishte influencuar edhe rezultatet.
Kupa e Botës 2026 do të organizohet bashkërisht nga 16 qytete në tre vende të Amerikës së Veriut; Kanada, Meksikë dhe Shtetet e Bashkuara. Turneu do të jetë i pari i organizuar nga tre kombe dhe i pari Botëror në Amerikën e Veriut që nga viti 1994. Argjentina është kampione në fuqi.
Discussion about this post