Show i Ramës në Athinë/ Kryebashkiakët, rol “patronazhisti” për të mbledhur njerëz

Kryeministri Edi Rama zhvilloi një takim “pompoz” në Athinë, me ata që u tha se ishin emigrant shqiptarë që u mblodhën për të dëgjuar fjalimin e gjatë të kreut të Partisë Socialiste.

Në këtë aktivitet, Rama u shoqërua nga “shejtan-budallenj”, ndaj disa kryebashkiakë, të cilët duket se kanë luajtur rolin e “patronazhistëve” për të siguruar pjesëmarrjen në aktivitet.

Përse janë “shejtan-budallenj”? Sepse, në tentativë për t’i treguar liderit të tyre politik se janë angazhuar në mbledhjen e njerëzve, kanë postuar foto nga Athina, ku shfaqen me grupe njerëzish, të cilët, me shumë mundësi janë “të patronazhuarit” e tyre.

Foto në rrjete sociale nga Athina kanë publikuar kryebashkiaku i Elbasanit, Gledjan Llatja, gaztori Erion Isai që drejton bashkinë e Kolonjës, Flamur Golemi që drejton Bashkinë e Gjirokastrës apo edhe Majlinda Bufi e Roskovecit. Shumë zyrtarë të tjerë, nga bashkia Tiranë, Durrës e njësi të tjera të qeverisjes qendrore e vendore ishin shoqërues të Edi Ramës në takimin me “emigrantët shqiptarë”.

Burime mediatike deklaruan se nga Shqipëria janë nisur rrethj 50 autobusë me qytetarë shqiptarë për të bërë dekorin e takimit “festiv” të Ramës në Athinë. Shumë të tjerë kanë kaluar me automjete apo furgona, siç tregonin pamjet e publikuara, kryesisht në media sociale.

Rama u shfaq në kryeqytetin grek në cilësinë e kryetarit të Partisë Socialiste, por ai përdori benefitet e kryeministrit. Ai mbërriti në Athinë me avionin “Air Albania”, i cili është nënkontraktuar nga qeveria me një kontratë sekrete për aktivitetet e tij si kryeministër.

Gjithashtu, takimi në Athinë u tha se kishte si qëllim që maxhoranca të njihej me problematikat e emigantëve shqiptarë në Greqi.

Por, i gjithë aktiviteti ishte vetëm fjala e Ramës, i cili u hoq si një “lider global” që po “sfidonte fqinjët problematikë grekë” nga kryeqendra e tyre, Athinë.

Në fakt, takimi i Athinës rezultoi që ishte thjesht një aktiv lokal i Partisë Socialiste, me “kusurin” e kryebashkiakëve dhe drejtorëve qeveritarë që të luanin rolin e “patronazhistëve” dhe të shpenzonin ca kohë, energji, por pse jo edhe para, për të dërguar njerëz nga Shqipëria drejt Athinës./ Boldnews.al