Ish-presidentja e Gjykatës së Lartë të Malit të Zi, Vesna Medenica, u arrestua për shpërdorim detyre pasi u publikuan transkriptet e djalit të saj duke thënë se ajo do të mbronte marrëveshjet e tij të paligjshme për trafik kokaine dhe cigaresh kontrabandë. Vesna Medenica u arrestua të dielën në aeroportin e Podgoricës pasi mediat publikuan transkriptet e shkëmbimeve të mesazheve mes djalit të saj, Milos Medenica, dhe oficerit të policisë Darko Laloviç, në të cilat ata organizonin blerjen e kontrabandës së kokainës dhe cigareve në portin e Tivarit. Në transkriptet e bisedave duke përdorur aplikacionin e koduar të mesazheve Sky ECC, Milos Medenica pretendoi se nëna e tij ishte në dijeni të biznesit të tyre të paligjshëm dhe tha se ata mund të presin mbrojtje prej saj.
Mediat raportojnë se ajo është arrestuar për shpërdorim detyre.
Ministria e Drejtësisë, të Drejtave të Njeriut dhe të Pakicave tha të hënën se arrestimi i Medenicës ishte një sinjal pozitiv për luftën e vendit kundër korrupsionit të nivelit të lartë.
“Ne i japim mbështetje të plotë Prokurorisë Speciale të Shtetit dhe institucioneve të tjera që udhëheqin luftën kundër korrupsionit të nivelit të lartë dhe krimit të organizuar, në mënyrë që të mos ketë më të paprekshëm në Mal të Zi,” tha ministria në një deklaratë për shtyp.
Më 6 prill, Vesna Medenica mohoi akuzat kundër saj dhe u bëri thirrje autoriteteve që të hetojnë.
Pas arrestimit të saj të dielën, ajo u shtrua në spital. Qendra Klinike Malazeze njoftoi se ajo do të trajtohet për një çrregullim metabolik.
Agjencia evropiane e zbatimit të ligjit EUROPOL dërgoi transkriptet e mesazheve të koduara në prokurorinë malazeze tetorin e kaluar.
Laloviç u arrestua më pas dhjetorin e kaluar dhe u akuzua për krijimin e një organizate kriminale dhe trafik droge, ndërsa mediat raportuan se ai po bashkëpunonte me bandën e Kavaçit, një grup kontrabandistësh droge nga qyteti i Kotorrit.
Më 7 prill, Prokuroria Speciale e Shtetit nisi një hetim për Medenicën, e cila u largua nga vendi dhjetorin e kaluar menjëherë pas arrestimit të Laloviqit.
Më 9 prill, Milan Knezeviç, një nga udhëheqësit e Frontit Demokratik, i cili është pjesë e koalicionit qeverisës të vendit, akuzoi prokurorinë shtetërore dhe policinë se i mundësuan Milos Medenicës të largohej nga vendi.
Më 12 prill, presidenti malazez Milo Gjukanoviç tha se rasti do të jetë një sfidë për zyrën e prokurorisë dhe gjyqësorin. “Nuk ka dyshim se ata do të luajnë rolin e tyre profesionalisht, do të shqyrtojnë të gjitha rrethanat dhe do të informojnë publikun malazez për veprimet e tyre në këtë rast,” tha Gjukanoviç në një konferencë për shtyp.
Vesna Medenica dha dorëheqjen në dhjetor, disa muaj pasi vendimi për t’i dhënë asaj një mandat të tretë si kryetare e Gjykatës së Lartë u kritikua nga Komisioni Evropian dhe nga OJQ-të në Mal të Zi.
Ajo tha se nuk donte të ishte pengesë në rrugën e vendit drejt anëtarësimit në Bashkimin Evropian dhe akuzoi mediat dhe OJQ-të se minojnë autoritetin e zyrtarëve gjyqësorë dhe mohojnë arritjet e tyre.
Medenica për herë të parë u zgjodh në krye të Gjykatës Supreme në vitin 2007 dhe u rizgjodh në vitin 2014 dhe 2019. Para mandatit të saj të parë ishte prokurore supreme e shtetit.
Por në vitet e fundit, opozita dhe OJQ-të e kanë akuzuar atë për rezultate të dobëta në reformat gjyqësore dhe për lidhje politike me Presidentin Milo Gjukanoviç dhe Partinë e tij Demokratike të Socialistëve, DPS, e cila sundoi vendin për tre dekada.
Në raportin e tij të vitit 2020 mbi përparimin e Malit të Zi drejt anëtarësimit në BE, Komisioni Evropian tha se dhënia e mandatit të tretë për Medenicën “ngre shqetësime serioze mbi frymën e kuadrit kushtetues dhe ligjor, i cili i kufizon ato emërime në një maksimum dy mandate për të parandaluar mbi -përqendrimi i pushtetit brenda gjyqësorit”.
Në dhjetor 2019, media pretendoi se Vesna Medenica ishte e përfshirë në marrëveshje pronësie me biznesmenin Zoran Beciroviç. Sipas organizatës mbikëqyrëse MANS, në vitin 2015 Medenica i shiti Beciroviqit një pronë në qytetin Kolasin për 139,000 euro, por nuk e raportoi shitjen në Agjencinë Kundër Korrupsionit. Sipas ligjit, zyrtarët shtetërorë duhet të deklarojnë të gjitha ndryshimet në pasuri më të mëdha se 5000 euro. Medenica i mohoi akuzat.
Beciroviç, i parë si i afërt me udhëheqësin malazez Gjukanoviç për më shumë se një dekadë, është një ish-pronar i disa pronave luksoze në Mal të Zi dhe ka lidhje biznesi në Rusi.
Ai paditi MANS dhe gazetat e përditshme Dan dhe Vijesti për publikimin e pretendimeve në lidhje me lidhjet e tij të supozuara të biznesit me Medenicën.
Discussion about this post