Në orën 9 të ditës së sotme u zhvillua në GJKKO seanca e radhës ndaj ish-kryebashkiakut të Bulqizës, Lefter Alla. Gjatë seancës, u depozitua një tjetër kërkesë për një masë më të lehtë sigurie se ajo e arrestit me burg.
Pak kohë më parë Alla përfundoi në spitalin e burgut për shkak të probleme shëndetësore. Ai po mbahet në paraburgim deri në përfundim të hetimeve lidhur me një tender 3 mln euro për ujësjellësin dhe kanalizimet në Bulqizë.
Po në këtë orë, në një ambient tjetër të po kësaj Gjykate, u rrëzua edhe kërkesa e Fredi Belerit për të marrë pjesë ditën e nesërme në ceremoninë e betimit si kryebashkiak i Himarës. Beleri, kërkoi leje nga Drejtoria e Burgjeve, SPAK e GJJKO për të dalë nga paraburgimi për ceremoninë e marrjes së detyrës në Këshillin Bashkiak të qytetit të martën e 27 qershorit në ora 11.00, mirëpo s’do mund të marrë pjesë.
Gjithashtu ish-kryebashkiaku socialist i Kukësit, Safet Gjici, i cili ra në pranga ditën e shtunë me kërkesë të SPAK, pritet të dalë në orën 13:00 para Gjykatës së Posaçme, ku do t’i caktohet masa e sigurisë.
SPAK nisi hetimet kryesisht në lidhje me akuzën “Shpërdorim detyre” pas publikimit të videoskandalit, por për Gjicin është rënduar akuza “Korrupsion pasiv” parashikuar nga neni 260 i Kodit Penal, pasi në videon e plotë të publikuar dilte në pah biseda e tij me gruan me të cilën kryente marrëdhënie, për një tender për sterilizimin e qenve.
Gjici me këtë akuzë rrezikon deri në 7 vite burg, por se kjo varet nga ajo se si do të shkojë çështja ndaj tij. Pas arrestimit të Safet Gjicit, është lënë në “Arrest Shtëpie” gruaja e cila shfaqej në videon seksuale në zyrën e bashkisë.
Discussion about this post